भांगरभूंय | प्रतिनिधी
आदलो वस्ताद राजस्थान अंदूंच्या रॉयल्सान इंडीयन प्रिमीयर लिगेंत (आयपीएल) सेगीत चवथ्या जैताची नोंद केली. ताणें रॉयल चॅलेंजर्स बंगळुरूक 6 विकेटींनी हारयलो. बंगळुरूची ही चवथी हार थारली.
बंगळुरून दिल्ले 184 धांवड्यांचे मोखीचो फाटलाव करपी राजस्थानान 19.1 ओव्हरींनी 4 विकेटी वगडावन 189 धांवड्यो करून जैत जोडलें. राजस्थानाच्या जोस बटलरान सको मारून आपलो शेंकडो पुर्ण केलो, जाल्यार दुसरे वटेन बंगळुरू हारिल्ल्यान कोहलीचो शेंकडो फुकट गेलो.
बटलरान 58 बॉलांनी नाबाद 100 धांवड्यो केल्यो. तशेंच ताणें मुखेली संजू सॅमसना वांगडा मेळून 148 धांवड्यांची म्हत्वाची भागिदारी केली.
ते आदीं रॉयल चॅलेंजर्स बंगळुरूचो आदलो मुखेली विराट कोहलीच्या नाबाद 113 धांवड्यांच्या नेटार निर्धारीत 20 ओव्हरींनी 3 विकेटी व्हगडावन 183 धांवड्यो केल्यो.
राजस्थाना कडल्यान पयलीं बॅटींग करपाचें आमंत्रण मेळ्ळ्या उपरांत कांय प्रमाणांत स्लो खेळपट्टीचेर कोहली आनी मुखेली फाफ ड्युप्लेसीस हांकां जुळून घेवपाक मात्सो वेळ लागलो खरो पूण, सेट जाल्या उपरांत दोगांयनी धांवड्यांचो पावस घालो. सुरवातीच्या स ओव्हरींनी बिनबाद 53 धांवड्यो केल्यो. पावरप्ले सोंपल्या उफरांत दोगांयनी खासा करून कोहली आनीक चड आक्रमक जायत गेलो.
ड्युप्लेसी (44) बाद जावचे पयलीं ताणें कोहली वांगडा मेळून 14 ओव्हरींनी 125 धांवड्यांची भागिदारी केल्ली. ते उपरांत ग्लॅन मॅक्सवॅल आनी सौरव चौहान सवाय भितर तंबूंत परतले. पूण, कोहलीन दुसरे बाजूच्यान धांवड्यांचो पावस घालप चालूच दवरिल्लो. ताच्याच यत्नाक लागून बंगळुरूक दोनश्यांच्या लागसार पावप शक्य जालें.
राजस्थाना वतीन युजवेंद्र चहलान दोन आनी नांद्रे बर्गरान एक विकेट घेतली. कोहलीन 67 बॉलांनी शेंकडो पुर्ण केलो. आयपीएलाच्या इतिहासांतलो ताचो हो आठवो शेंकडो थारलो.
हे मॅची पयलीं हांगाच्या सवाई मान सिंग मैदानाचेर कोहली आठ मॅची खेळिल्लो. पूण, ताचें प्रदर्शन ताच्या नांवाक सोबा सारकें नाशिल्लें. ताणें फकत 25चे सरासरीन धांवड्यो केल्ल्यो. पूण, फाटलें अपेस ताणें काल पुसून उडयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
