भांगरभूंय | प्रतिनिधी
राजस्थान रॉयल्सान इंडीयन प्रिमीयर लिगेंतलें (आयपीएल) पांचवें जैत जोडून बाद फेरयेंत सुवात मेळोवपाचे वटेन पावलां मारल्यात. काल जाल्ले मॅचींत ताणें पंजाब किंग्साक 3 विकेटींनी हारयलो. ह्या जैता सयत ताचे 10 गूण जाल्यात आनी ताणें गुणतकट्यांतली आपली पकड घट केल्या.
पंजाब किंग्सान पयलीं बॅटींग करतना 20 ओव्हरींनी 8 विकेटी व्हगडावन 147 धांवड्यो केल्यो. ताका जाब दितना राजस्थान रॉयल्सान 19.5 ओव्हरींनी 7 बाद 152 धांवड्यो करून जैत जोडलें.
राजस्थान रॉयल्सान सहज जिखपाक येता अशी ही मॅच गरज नासतना चुरशीची केली आनी पंजाब किंग्साक तकली वयर काडपाक संद दिली. अखेरचे ओव्हरी मेरेन मॅचीची चुरस कायम उरली. अर्शदीप सिंगान 20वे ओव्हरींतले पयले दोन बॉल मेडन घाले. पूण, शिमरोन हेटमायरान तिसऱ्या बॉलाचेर सको मारलो आनी 3 बॉलांनी 4 धांवड्यो अशी मॅच राजस्थाना वटेन घुंवडायली. अखेरेक ताणें उरिल्ल्यो धांवड्यो करून जैत मेळोवन दिलें.
ते आदीं राजस्थान रॉयल्साचो मुखेली संजू सॅमसनान टॉस जिखून पयलीं बॉलींग करपाचो निर्णय घेतलो. ताचो हो निर्णय ताच्या बॉलरांनी योग्य थारायलो. अथर्व तायडेन (15) आक्रमक सुरवात करून दिवपाचो यत्न केलो खरो. पूण, आवेश खानान ताका बाद केलो. दुसरो धपको 41 धांवड्यांचेर बसलो. लेग स्पिनर युजवेंद्र चहलान प्रभसिमरन सिंगाक (10) बाद केलो. ते उपरांत केशव महाराजान जॉनी बॅयरस्टोक तंबूंत धाडलो. बॅयरस्टो फकत 15 धांवड्यो करून बाद जालो.
सॅम करनान पांच आनी शशांक सिंगान णव धांवड्यो केल्यो. ते उपरांत आवेश खानान फॉर्मांत आशिल्ल्या जितेश शर्माक बाद केलो. तो बाद जालो त्या वेळार पंजाबाचो 103 स्कोर जाल्लो. जितेश शर्मान एक चवको आनी दोन सक्यांचे मजतीन 29 धांवड्यो केल्यो. ते उपरांत लियाम लिव्हिंगस्टोन 21 धांवड्यो करून परतलो. ताका संजू सॅमसनान धांवबाद केलो. पंजाबा खातीर डॅथ ओव्हरींनी आशुतोष शर्मा संकटमोचक थारलो. ताणें फकत 16 बॉलांनी 31 धांवड्यो केल्यो. ताणें 193.75चे स्ट्रायक रेटीन धांवड्यो करतना एक चवको आनी तीन सके मारले. निमाणे ओव्हरीच्या निमाण्या बॉलाचेर ताका ट्रॅण्ट बोल्टान बाद केलो.
पंजाबान पावरप्लेंत 1 विकेट वगडावन 38 धांवड्यो केल्यो. अंदूंचे आयपीएलांत हो पावरप्लेंतलो चवथ्या क्रमांकाचो स्कोर थारलो. पयले सुवातेर लेगीत पंजाबूच आसा. सनरायझर्स हैदराबादा आड खेळटना पंजाबान पावरप्लेंत 3 विकेटी वगडावन 27 धांवड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
