राजस्थानाचें आकर्शक जैत

भांगरभूंय | प्रतिनिधी

मुंबय इंडियन्साक 9 विकेटींनी हारोवन येजमान राजस्थान रॉयल्सान गुणतकट्यांतली आपली पयली सुवात घटमूट केली.  हांगाच्या सवाई मानसिंग स्टेडियमाचेर जाल्ले मॅचींत मुंबय इंडियन्सान दिल्ली 172 धांवड्यांची मोख राजस्थान रॉयल्सान 18.4 ओव्हरींनी 1 विकेट व्हगडावन 183 धांवड्यो करून मेळयली.

राजस्थाना वतीन यशस्वी जयस्वाल पर्जळ्ळो. ताणें नाबाद 104 धांवड्यांची खेळी. केली. ताणें 60 बॉलांक तोंड दितना णव चवके आनी सात सके मारले.  

ते आदीं मुंबय इंडियन्साची सुरवात बाबत जाल्ली. 3 बाद 20 अशी तांची अवस्था जाल्ली. त्या वेळार तिलक वर्मा बॅटिंगेक आयलो आनी आपले आक्रमक बॅटिंगे नेटार मुंबय इंडियन्साक धांवड्यांचो दोंगर उबारून दिलो.

तिलक वर्मान नेहाल वधेरा वांगडा मेळून 99 धांवड्यांची भागिदारी केली आनी पंगडाचे धांवसंख्येक आकार दिलो. आपले जबरदस्त खेळीच्या नेटार तिलकान मुंबय इंडियन्साक 179 अशी आव्हानात्मक धांवसंख्या उबारून दिवपाक मोलादीक योगदान दिलें. तिलक वर्मान 45 बॉलांनी 5 चवके आनी तीन सक्यांचे मजतीन 65 धांवड्यांची खेळी केली.

ते आदीं मुंबय इंडियन्सान टॉस जिखून पयलीं बॅटींग करपाचो निर्णय घेतलो. रोहीत शर्मान पंगडाक चवको मारून बरी सुरवात करून दिली. पूण, ही सुरवात क्षणीक थारली. कारण पयलेच ओव्हरींत राजस्थानाचो फास्ट बॉलर ट्रॅण्ट बोल्टान रोहीताक बाद केलो. रोहीताक हे खेपे 6 धांवड्यांचेर समाधान मानचें पडलें. रोहीत बाद जालो आनी ते उपरांत ईशान किशन आनी सुर्यकुमार यादव लेगीत रोखडेत तंबूंत परतले. ईशानाक हे खेपे खातें लेगीत उगडपाक जमलें ना. जाल्यार सुर्यकुमार यादवान 10 धांवड्यो केल्यो. अशे तरेन मुंबयची स्थिती 3 बाद 20 अशी जाल्ली. ते उपरांत मोहम्मद नबी कांय वेळ खेळपट्टीचेर तग धरून रावलो. पूण, युजवेंद्र चहलान ताका बाद केलो आनी अंदूंच्या हंगामांत 20 विकेटी घेवपाचो टप्पो हुपलो. नबीन 23 धांवड्यांचें योगदान दिलें. नबी बाद जाल्या उपरांत हार्दीक पांड्या बॅटिंगेक येतलो अशें दिशिल्लें. पूण, हार्दीकान ह्या वेळार नेहाल वधेराक बडती दिली. मुंबय इंडियन्साचो हो निर्णय येसस्वी थारलो. कारण तिलक वर्मान नेहाला वांगडा मेळून मुंबय इंडियन्साचो डाव सांबाळ्ळो. दोगांयनी पांचवे विकेटी खातीर 99 धांवड्यांची भागिदारी केली. दोगूय आतां व्हड खेळी करतले अशे दिशिल्लें. पूण, त्याच वेळार बोल्टान वधेराक बाद केलो आनी ही जोडी फुटली. वधेराक अर्द शेंकडो फकत एके धांवडेन चुकलो. ताणें 24 बॉलांनी तीन चवके आनी चार सक्यांचे मजतीन 49 धांवड्यो केल्यो.

धांवसंख्येक बरे तरेन मुळावण मेळ्ळ्या उपरांत हार्दीक पांड्या बॅटिंगेक आयलो. पूण, ताच्या कडल्यान फावोशी बॅटींग जाली ना. ते उपरांत थारावीक अंतरान विकेटी पडत गेल्यो आनी मुंबयक निर्धारीत ओव्हरींनी 9 विकेटी व्हगडावन 179 धांवड्यो केल्यो.