भांगरभूंय | प्रतिनिधी
राजस्थान रॉयल्साची अंदूंचे इंडीयन प्रिमीयर लिगेंतली (आयपीएल) जैताची धांव थांबली. काल हांगाच्या सवाई मानसिंग स्टेडियमाचेर जाल्ले मॅचींत ताका गुजरात टायटन्सा कडल्यान 3 विकेटींनी हार घेवची पडली.
राजस्थान रॉयल्स फाटल्यो सेगीत चार मॅची जिखिल्ल्यो. राजस्थान रॉयल्सान निर्धारीत 20 ओव्हरींनी 3 विकेटी व्हगडावन 196 धांवड्यो केल्ल्यो. ताका जाप दितना गुजरात टायटन्सान 20 ओव्हरींनी 7 विकेटी व्हगडावन 199 धांवड्यो करून जैत जोडलें.
राजस्थानाचो मुखेली संजू सॅमसन आनी रियान पराग हे जोडयेन जबरदस्त बॅटींग केल्या उपरांत कुलदीप सेन आनू युजवेंद्र चहल हांणी बरी बॉलींग घाली. पूण, गुजराताचो मुखेली शुभमन गिलान खेळपट्टीचेर तग धरून 72 धांवड्यांची खेळी केली आनी उपरांत राहुल तेवतिया आनी राशीद खान हे जोडयेन मॅच सोंपयली.
ते आदीं गुजरातान टॉस जिखून पयलीं राजस्थानाक बॅटींग करपाचें आमंत्रण दिलें. यशस्वी जयस्वाल आनी जोस बटलर हांकां वळेरेन उमेश यादव आनी राशीद खान हांणी बाद करून गुजरात टायटन्साक मॅचीचेर पकड मेळोवन दिल्ली. पूण, संजू सॅमसन आनी रियान पराग हांणी तिसरे विकेटी खातीर 78 बॉलांनी 130 धांवड्यांची भागिदारी केली. तशेंच गुजरातान तीन-चार कॅची सोडल्यो ताका लागून राजस्थान रॉयल्साक बरी धांवसंख्या उबारपाक येस आयलें.
बटलरान फाटले मॅचींत नाबाद शेंकडो नोंदयिल्लो. पूण, काल तो फकत 8 धांवड्यो करून परतलो. यशस्वी जयस्वालाचो फॉर्म हुस्क्याचो विशय आसा. ताणें 24 धांवड्यो केल्यो.
राजस्थान एका वेळार संघर्श करतालो. ताणें सुरवातीच्या 10 ओव्हरींनी 2 विकेटी व्हगडावन फकत 73 धांवड्यो केल्ल्यो. हांगाच्यान सॅमसन आनी पराग हाणें डाव सांबाळ्ळो आनी फुडल्या पांच ओव्हरींनी 61 धांवड्यांची भर घाली. सॅमसन आनी पराग हाणें गुजराताच्या बॉलरांची बॉलींग फोडून काडली. 15 ओव्हरींनी ताणें 134 धांवड्यो केल्यो. परागान धांवड्यांचो पावस घालो. ताणें फकत 35 बॉलांनी अर्द शेंकडो पुर्ण केलो. 19वे ओव्हरींत शिमे लागसार विजय शंकरान उत्कृश्ट रितीन कॅच धरून परागाची खेळी सोंपयली. ताणें 48 बॉलांनी तीन चवके आनी पांच सक्यांचे मजतीन 76 धांवड्यो केल्यो.
निमाण्या ओव्हरींनी शिमरोन हेटमेयरान आक्रमक बॅटींग केली. ताणें पांच बॉलांनी 13 धांवड्यांची खेळी करून पंगडाचो स्कोर दोनशेंच्या लागसार पावयलो.
गुजराता वतीन उमश यादव, राशीद खान आनी मोहीत शर्मा हाणें एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
