भांगरभूंय | प्रतिनिधी
पणजी, बातमीदार: राजभास संचालनालयान २०१९- २०२०, २०२०- २०२१ आनी २०२१- २०२२ वर्सा खातीरचे भाशा पुरस्कार हालींच जाहीर केल्यात. ते मुख्यमंत्री डॉ. प्रमोद सावंत हांचे हस्तुकीं फाल्यां ५ मार्चाक सांजेच्या ५ वरांचेर संस्कृती भवनांत आयोजीत केल्ल्या सुवाळ्यांत भेटयतले.
राजभास संचालनालया वतीन भाशेचे उदरगती खातीर ‘भाशा पुरस्कार येवजण’ चालीक लायता. कोंकणी, मराठी आनी संस्कृत भाशे खातीर वावुरपी व्यक्तींक हो पुरस्कार भेटयतात. अशा व्यक्तिमत्त्वांचो आदर्श लोकां मुखार दवरप आनी साहित्यिकांचो भोवमान करून तांणी भाशेचे उदरगती खातीर केल्ल्या कार्याची दखल घेवप हो सरकारचो उद्देश आसा.
२०१९- २०२० चो ‘रवींद्र केळेकार कोंकणी भाशा पुरस्कार’ पुंडलिक नारायण नायक हांकां, जाल्यार ‘बी. डी. सातोस्कर मराठी भाशा पुरस्कार’ उल्हास कुष्ट प्रभुदेसाय आनी ‘दुर्गाराम उपाध्ये संस्कृत भाशा पुरस्कार’ लक्ष्मण कृष्णा पित्रे हांकां भेटयतले.
२०२० – २०२१ चो ‘रवींद्र केळेकार कोंकणी भाशा पुरस्कार’ मीना सुरेश काकोडकार हांकां, ‘बी. डी सातोस्कर मराठी भाशा पुरस्कार’ सोमनाथ दत्ता कोमरपंत हांकां आनी ‘दुर्गाराम उपाध्ये संस्कृत भाशा पुरस्कार’ मनोहर दत्ताराम आमशेकार हांकां भेटयतले.
२०२१- २०२२ चो ‘रवींद्र केळेकार कोंकणी भाशा पुरस्कार’ अशोक पांडुरंग भोंसले हांकां, ‘बी.डी. सातोस्कर मराठी भाशा पुरस्कार’ गुरुदास सीताराम सावळ हांकां भेटयतले. संस्कृत भाशा पुरस्कारा खातीर नामांकन येवंक नाशिल्ल्यान २०२१- २०२२ चो संस्कृत भाशा पुरस्कार दिवचे नात.
रोख १ लाख रूपया, शाल, सन्मानपत्र आनी यादस्तीक अशें पुरस्काराचें स्वरूप आसा.
पुरस्कार भेटवण सुवाळ्याक राजभास सचीव सरप्रीत सिंग गिल, राजभास संचालक राजू गावस, उपसंचालक अनिल एच. सावंत आनी हेर मानेस्त उपस्थित रावतले. उपरांत मानेस्तांच्या हस्तुकीं संपदा कुंकळकार हांच्या ‘गीतार्थ, भगवद्गीतेचो आपरोस’ आनी डॉ. हनुमंत चोपडेकर हांच्या ‘कोंकणी चळवळीचीं तीन पानां’ ह्या पुस्तकांचें प्रकाशन जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
