भांगरभूंय | प्रतिनिधी
अग्रलेख
…………………………………
राहुल गांधी हांच्या अपात्रतायेच्या निर्णयान भारतीय राजकारण घुसळपाक सुरवात जालां. तातूंतल्यान अमृत भायर सरता काय हलाहल (विख) तें रोखडेंच कळटलें.
…………………………………
अखेरेक राहुल गांधी हांची खासदारकी रद्द जाली. मोदी आडनांवाचेर केल्ली टिका तांकां बरीच म्हारग पडली. पयरूच सुरत (गुजरात) जिल्हो न्यायालयान तांकां दोशी थारावन 2 वर्सांचे बंदखणीची ख्यास्त दिल्ली. रोखडोच जामीनूय मंजूर केल्लो. 2013 च्या सर्वोच्च न्यायालयाच्या निकाला प्रमाण कोणूय लोकप्रतिनिधी दोशी थारल्यार, ताका तेच दीस अपात्र थारावपाक मेळटा. ते प्रमाण लोकसभेचे अध्यक्ष ओम बिर्ला हांणी राहुल हांकां संसदेचे वांगडी म्हूण अपात्र थारायतां, असो निर्णय काल दनपरां जाहीर केलो. तसो आदेशूय काडलो. हो राजकी सूड भावनेन घेतिल्लो निर्णय अशी टिका आतां विरोधकांनी केल्या. तर भाजपा समर्थकांनी खोस परगटायल्या. राहुल गांधी हे स्वातंत्र्या उपरांत सगल्यांत चड वर्सां देशाचेर राज्य केल्ल्या विरोधी पक्षाचे मुखेल फुडारी. म्हणटकच ह्या अपात्रतायेच्या निर्णयाक राजकी नदरेन चड म्हत्व आसा. फुडल्या कांय दिसांनी देशाच्या राजकी मळाचेर मोड आयलें, जाल्यार ती अजाप दिसपा सारकी गजाल नासतली.
राहुल गांधी हांकां संविधानाच्या कलम 102 (1) आनी लोकप्रतिनिधी कायद्याचें कलम 8 प्रमाण अपात्र थारयल्यात. ते अर्थांत उच्च न्यायालयांत अपील करतले. ताचे पयलींच हो अपात्रतायेचो निर्णय जावंक फाव नासलो, अशें भोवतेक राजकी जाणकारांक दिसता. पूण उच्च न्यायालयान 2 वर्सांची ख्यास्त रद्द केली तरी वांगडीपद परतून मेळतशें दिसना. ताका लागून वेंचणूक ही जातलीच. लोकसभा वेंचणुकेक अजून उणेच 13 म्हयने आसात. म्हणटकच चड करून वायनाड पोटवेंचणूक जावं येता. ती जाहीर जावचे पयलीं ख्यास्तीक स्थगिती मेळची म्हूण काँग्रेस यत्न करतली. तशें जाल्यारुच राहुल गांधी हांकां पोटवेंचणुकेक उबें रावपाक मेळटलें. ख्यास्तीक स्थगिती दिवंक ना जाल्यार आठ वर्सा राजकारणा पसून पयस रावचें पडटलें…. आनी हीच शक्यताय चड दिसता. अर्थांत कायद्यांत खंय तरी पळवाट आसतलीच. ख्यास्तीचो काळूय उणो जावं येता. तशे राहुल गांधी हांचे आड आनीक चार मानहानी खटले आसात. महात्मा गांधीजींचे हत्येचो आरोप राष्ट्रीय स्वयंसेवक संघाचेर दवरिल्लो. हो आरोप सामको चुकीचो अशें म्हणून भिवंडींत आठ वर्सां पयलीं एक याचिका दाखल जाल्या. स वर्सां पयलीं आसामांतल्या न्यायालयांत एक याचिका पावल्या. थंयच्या वैष्णव मठांत संघाच्या वांगड्यांनी म्हाका प्रवेश दिवंक ना, अशें राहुल हांणी म्हणिल्लें. मोदींक चोर म्हणिल्ल्याचीय एक याचिका झारखंडांत चलता. केश घालप्यान 20 कोटींचो दावो केला. गौरी लंकेश हांचे हत्येक संघाची विचारसरणी जापसालदार आसा, असो आरोप राहुल हांणी केल्लो. ती याचिका 2018 त महाराष्ट्रांतल्या शिवडी न्यायालयांत आसा. ह्या सगल्या केशींच्या सुनावणेकूय घडये आतां वेग येतलो. घडये, तातूंत पसून राहुल गांधी आडकूंक शकता. काँग्रेसीचे रेणुका चौधरीन आपणाक प्रधानमंत्री मोदी हांणी संसदेंत शूर्पणखा म्हणलें, ताची मानहानीची केश दाखल करपाचें थारायलां. फाल्यां, मौत का सौदागर, बारबाला, गोली मारो सालों को….. आनी हेर जायत्यो याचिका कोर्टांचीं सोंपणा चडपाक शकता. कोर्ट पत्रकारांची धांवपळ वाडूं येता.
हें चलतनाच विरोधकांनी कितें म्हणलां तेंय नदरे खालच्यान घालचें पडटलें. तांचें म्हणणें खरें काय टिके खातीर ती टिका हें काळ थारायतलो. राहुल गांधी हांचें वांगडीपद रद्द करप हें भारतांतली लोकशाय सोंपोवपाचे नदरेन उखलिल्लें एक पावल. हें लोकशाय विरोधी हुकुमशायेचें वागप, अशें कांय फुडाऱ्यांनी म्हणलां. तर केंद्रीय मंत्री प्रल्हाद पटेल हांणी राहुल गांधीन पुराय मागासवर्गीय, ओबीसी समाजाचो अपमान केला, अशी प्रतिक्रिया दिल्या. तर चोराक चोर म्हणप हो गुन्यांव थारला. ते मेकळे आसात आनी राहुलाक मात ख्यास्त दिल्या. लोकशायेची ही हत्या, अशें उद्धव ठाकरे हांणी म्हणलां. ओबीसी समाजांक आपले कडेन ओडपाचो भाजपाचो हो डावपेच अशें कांय पत्रकारांक दिसता. फाटलीं – 4 वर्सां ओबीसी समाज भाजपा वटेन ओडला. भाजपानूय तांच्या फुडाऱ्यांक बरीं पदां दिल्यांत. मंत्रीमंडळांतूय हालींच ओबीसी फुडाऱ्यांक घेतल्यात. देखून हें वोटबँकेचें राजकारण असो कांय जाणांचो दावो.
बऱ्याच दोशी फुडाऱ्यांचीं खासदारकी, आमदारकी हाचे पयलीं रद्द जाल्या. कांय जाणांचे करियर सोंपलां. तर थोडे हेवटेनच्या तेवटेन वचून वेंचूनय आयल्यात. राहुल गांधी हांच्या अपात्रतायेच्या निर्णयान भारतीय राजकारण घुसळपाक सुरवात जालां. तातूंतल्यान अमृत भायर सरता काय हलाहल (विख) तें रोखडेंच कळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
