भांगरभूंय | प्रतिनिधी
भांगरभूंय । प्रतिनिधी
पोरणे गोंयः रहिवाशी वाठारांत एफआरएफ सुविधा (मटेरियल रिकव्हरी फॅसिलिटी) उबारपाक सान्तईस्तेवकारांनी विरोध केला. विरोध आसतनाय ती उबारपाक खातीत जमीन नितळ करपाक पंचायत मंडळान सुरवात केल्ल्यान लोकांनी पंचायत कार्यालया सामकार जमून ताका विरोध केलो.
पंचायतीच्या ग्रामसभेंत लोकांनी रहिवाशी वाठारांत एमआरएफ खातीर विरोध केल्लो. तरीय आसतना शेनवारा तिचें काम सुरू केलां. लोकांक विस्वासांत घेनासतना पोरणे बांदकाम मोडून जमीन सपाट केल्या. ताचो विरोध करपाक आमकां पंचायत कार्यालया कडेन येवचें पडलें अशें लिंडिया रॉड्रिगज् हिणे सांगलें. रहिवाशी वाठारांत एमआरएफ बांदपाक आमचो विरोध आसा. पंचायत मंडळान ते खातीर दुसरी सुवात सोदून काडपाक जाय अशें ओर्लांदो हाणे सांगलें. एमआरएफ खातीर फावो ती परवानगी पंचायत मंडळान घेतल्या काय किदें हें आमकां कळपाक जाय अशें ताणे सांगलें.
मजगतीं एमआरएक सुविधा पयलींच्या पंचायत मंडळान 2019 वर्सा तयार केल्ली. मात तिचे खातीर चड सुवात मेळची हे खातीर आमी पयलीचें बांदकाम मोडून नवें बांदकाम करतात अशें उपसरपंच इस्तेव रिबेरो हांणे सांगलें. सुविधा उबारपा खातीर पयलींच्या पंचायत मंडळान फावो ते सगले परवाने घेतिल्ले अशी म्हायती ताणे दिली. नवी सुविधा उबारपा खातीर ग्राम उदरगत समितीन मान्यताय दिल्या. एमआरएफ सुविधेंतल्यान घाण आयल्यार ती बंद करपाक आपूण सगल्यांच्या फुडें आसतोलों हें आपणे लोकांक सांगलां. सध्याच्या एफआरएफ शेडी कडेन वापरिल्ल्यो ट्यूब लायटी, टायर आनी हेर तरेचो कोयर फाटल्या वीस वर्सां सावन पडून आसा. तो काडून आमी साळगांवच्या कोयर प्रकल्पांत धाडटले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
