रस्त्याचो प्रस्न सोडयना जाल्यार गांवचे लोक आंदोलन करतले: तारीमळ गांवकारांची शिटकावणी
भांगरभूंय | प्रतिनिधी
सांगें, प्रतिनिधी : बेंडवाडो पुलाक संक्रांतीचें सांवट आयिल्ल्याचें दिसून येता. पूल जालोच म्हणून जायना. ताचे वांगडा गांवच्या लोकांच्या रस्त्याचो प्रस्न सुटपाक जाय. आमकां बायपास रस्तो खंयच्यान आसतलो ताचो प्लेन दाखोवपाक जाय. आमकां तोंडी आस्वासनां नाकात. लेखी जाय. जर रस्त्याचो प्रस्न सुटना जाल्यार आमी तारीमळ गांवचे लोक आंदोलन करतले अशी खर शिटकावणी आयज तारीमळ लोकांनी बेंडवाडो पुला कडेन एकठांय जावन दिली.
फाटलीं सात वर्सां बेंडवाडो पुलाचें काम मंद गतीन चालू आसा. सांगें- कुडचडें जोडपी हो पूल केन्ना तरी जातलो काय? असो प्रस्न लोकां भितर घोळटा आनी ताका लागून लोक तिडकूय उक्तायतात. संबंदीत खात्याक हाचें कांयच पडूंक ना. पूल करतना लोकांचे प्रस्न सुट्टले काय ना? हाचोय तांणी मात्तूय विचार करूंक ना. आमी थळाव्या आमदारा कडेन हे विशीं उलोवपाक गेल्ले. तेन्ना आमदारान आमकां रस्त्याचो प्लॅन हाडून दाखयतां म्हणून सांगलें. आजूनय दिवंक ना, अशें कोस्तांव मास्कारेन्हांस हांणी सांगलें.
आमी रस्त्याक लागून झगडात. बायपास रस्तो खंयच्यान जातलो हें कॉट्रेक्टर आमकां तोंडी सांगता. आमकां तें लेखी जाय. जर आमकां रस्त्याचें लेखी स्पश्टीकरण दिना जाल्यार आमी धरणें आंदोलन करतले, अशी शिटकावणी ह्या वेळार लोकांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
