रवी, भाटीकार हांच्या मरणाक लागून राजकी समिकरणां बदल्लीं

भांगरभूंय | प्रतिनिधी

फोंड्यां भाजपाचे उमेदवारी खातीर रितेश, दळवी मदीं लडत

राजेश वेरेंकारूक काँग्रेस तिकेटी खातीर इत्सूक

फोंडें: फोंडें मतदारसंघांत 2022 वर्सा जाल्ल्या विधानसभा वेंचणुकेंत रवी नायक हांच्या रुपान भाजपान हो मतदारसंघ पयलेच फावटी जिखलो. पूण कृशी मंत्री आशिल्ले रवी नायक हांकां आयिल्ल्या मरणाक लागून सद्या मतदारसंघांत भाजपा मुखार पेंच निर्माण जाला. इत्सूक उमेदवारांचे संख्येंत वाड जाल्ल्यान पक्षांत विधानसभा वेंचणुके वेळार बंडखोरी जावपाची शक्यताय वाडल्या. तातूंत केतन भाटीकार हांकां मरण आयिल्ल्यान तांच्या कार्यकर्त्यांक आपल्या गटांत ओडपाक भाजप, काँग्रेस आनी मगो पक्ष यत्न करतात.

कृशी मंत्री रवी नायक हांच्या मरणा उपरांत पोटवेंचणूक जाहीर जाली. भाजपान रितेश नायक हांकां उमेदवारी दिली, जाल्यार काँग्रेस पक्षा वतीन केतन भाटीकार रिंगणांत देंवले. पूण पोटवेंचणुकेच्या मतदाना दिसाच न्यायालयान पोटवेंचणूक रद्द करपाचो आदेश दिलो. ताका लागून सद्या फोंडें मतदारसंघ आमदारा बगर वाटचाल करीत आसा. येता ते विधानसभा वेंचणुकेंत भाजपाचे तिकेटी खातीर रितेश नायक आनी विश्वनाथ दळवी हांचे मदीं चुरस निर्माण जाल्या. तातूंत काँग्रेसीचे राजेश वेरेंकार हांणी लेगीत मतदारां कडेन संपर्क वाडयला. तातूंत मगो पक्षान फांडें मतदारसंघांत नवी कचेरी सुरू करपाची तयारी केल्ल्यान मतदारां मदीं गोंदळ निर्माण जाला. मगो पक्षाचे फुडारी तशेंच वीज मंत्री सुदिन ढवळीकार कसली भुमिका घेतात हाचे कडेन सगल्यांचें लक्ष लागून आसा. तशेंच आम आदमी पक्ष, गोवा फॉरवर्ड आनी हेर पक्षा वतीन उमेदवार विधानसभा वेंचणुकेच्या रिंगणांत देंवपाची शक्यताय आसा.

फोंडें मतदारसंघांत 2022 वर्सा रवी नायक हांणी भाजपांत प्रवेश करून भाजपाक जैतिवंत करून दिल्लें. पूण फाटल्या वर्सा रवी नायक हांकां मरण आयिल्ल्यान सद्या मतदारसंघ आमदारा बगर आसा. तातूंत भाजप मंडळाचे अध्यक्ष तशेंच नगरसेवक विश्वनाथ दळवी हांणी फाटल्या 2-3 वर्सां सावन विधानसभा वेंचणूक लडोवपा खातीर यत्न सुरू केल्यात. ताका लागून येता ते विधानसभा वेंचणुकेंत भाजप पक्षश्रेश्ठी नगरसेवक आशिल्ले रितेश नायक काय नगरसेवक विश्वनाथ दळवी हांकां उमेदवारी दितले हाचे कडेन सगल्यांचें लक्ष लागून उरलां.

केतन भाटीकार हांकां मरण आयले उपरांत सद्या तांचे भाव कसली भुमिका घेतात हें अजून स्पश्ट जाल्लें ना. पूण कौतूक भाटीकार हांणी केतन भाटीकार हांचें समाजसेवेचें व्रत मुखार व्हरपाचो यत्न केला. दुसरे वटेन, काँग्रेसीचे राजेश वेरेंकार हांणी येता ते विधानसभेंत रिंगणांत देवपाचो खर निश्चेव केल्ल्याचें दिसून येता. फोंडें नगरपालिका तशेंच कुट्टी पंचायतीच्या लोकांच्यो गांठीभेटी घेवपा बराबरच मजत करपाचें काम सुरू केलां. ताका लागून मतदारसंघांत काँग्रेस पक्ष परतून बाजी मारपाचे तयारेंत आशिल्ल्याचें दिसून येता.

मडकय मतदारसंघांत फाटल्या कांय वर्सां सावन वर्चस्व प्रस्थापीत केल्ले वीज मंत्री सुदिन ढवळीकार हांणी फोंडें मतदारसंघांत नवी कचेरी सुरू करपाची तयारी केल्या. ताका लागून फोंडें मतदारसंघांत मगो पक्षा वतीन मिथील ढवळीकार काय सुदिन ढवळीकार वेंचणूक लडयतले हाची चर्चा सुरू आसा. तशेंच फाटल्या कांय वर्सां सावन फोंडें मतदारसंघांतल्या राजकारणांत म्हत्वाची भुमिका वठोवपी नगरसेवक व्यंकटेश उर्फ दादा नायक लेगीत ऐनवेळार विधानसभा वेंचणूक लडोवपाची शक्यताय उक्तायतात. आम आदमी पक्षाचे गीतेश नायक लेगीत लोकांच्या समस्या संबंदी आवाज काडून लोकांक थाकाय दिवपाचो यत्न करतात.

फाटल्या कांय वर्सां सावन गोंयांत भाजप आनी मगो पक्षाची युती सरकार कार्यरत आसा. पूण फोंडें मतदारसंघांत भाजप आनी मगो पक्षाचे कार्यकर्ते आयज मेरने एकठांयपणान काम करतना दिसून आयले नात. फोंडें पालिका आनी कुट्टी पंचायतींत लेगीत भाजप आनी मगो पक्षाचो संघर्श सेगीत सुरू आशिल्ल्याचें दिसून येता. ताका लागून येता ते विधानसभा वेंचणुकेंत भाजप-मगो पक्षाची युती परतून जातली? असो प्रस्न मतदार करतात.

फोंडें मतदारसंघांत 2022 वर्सा जाल्ले विधानसभा वेंचणुकेंत भाजप उमेदवार रवी नायक हांकां 7514 मतां, मगो पक्षाचे केतन भाटीकार हांकां 7437 मतां, काँग्रेसीचे राजेश नायक हांकां 6839 मतां, आम आदमी पक्षाचे अ‍ॅड. सुरेल तिळवे हांकां 620 मतां, आरजीचे सानीश तिळवे हांकां 1779 मतां, अपक्ष उमेदवार संदीप सिनाय खांडेपारकार हांकां 1237 मतां जाल्यार अपक्ष उमेदवार नरेश पडवळ हांकां 92 मतां मेळिल्लीं.

विश्वनाथ दळवी सरिल्ले फाटीं

रवी नायक हांच्या मरणा उपरांत जाहीर जाल्ले पोटवेंचणुकेंत भाजपाचे उमेदवारी खातीर रवी नायक हांचे पूत रितेश नायक हांचें नांव मुखार आशिल्लें. पूण भाजपाचे मंडळ अध्यक्ष विश्वनाथ दळवी हांणी उमेदवारी खातीर इत्सूक आशिल्ल्याचें दाखयिल्ल्यान पेंच निर्माण जाल्लो. मुख्यमंत्री प्रमोद सावंत, भाजप प्रदेशाध्यक्ष दामू नायक हांणी दळवी हांची समजूत काडून रितेश हांचो मार्ग मेकळो केल्लो. पूण न्यायालयाच्या निकालाक लागून वेंचणूक रद्द जाली. आतां फुडले वेंचणुके वेळार भाजपाची उमेदवारी विश्वनाथ दळवी हांकां मेळटली काय रितेश नायक हांकां मेळटली हे विशीं उत्सुकताय आसा.