रवींद्र जडेजा पुर्ण तंदुरुस्त

भांगरभूंय | प्रतिनिधी

अश्टतासांचो खेळगडो रवींद्र जडेजा पुर्ण तंदुरुस्त जाल्ल्यान 9 फेब्रुवारी सावन नागपूरांत सुरू जावपी ऑस्ट्रेलिये आडचे पयले टॅस्टी खातीर ताची भारताच्या पंगडांत निवड जातली. जाल्यार श्रेयस अय्यराक दुखापतीक लागून पयली टॅस्ट चुकतली. दुसरे टॅस्टींत ताचें पुनरागमन जावपाची शक्यताय आसा.

पोरूं जुलयांत जडेजा निमाणी टॅस्ट खेळिल्लो. ते उपरांत जडेजाक आशियायी करंड सर्ती वेळार दुखापत जाल्ली. ताका लागून जडेजाक संवसारीक टी-20 सर्त लेगीत चुकिल्ली. तेन्ना सावन तो क्रिकेटीच्या मैदानांतल्यान पयस आसा.

मजगतीं, फास्ट बॉलर जसप्रीत बुमरा लेगीत पुर्ण तंदुरुस्त जाला. ऑस्ट्रेलिये आडच्या पयल्या दोन मॅचीं खातीर भारताच्या पंगडाची घोशणा जाल्या. पूण, निमाण्या दोन मॅचीं खातीर भारताचो अणभवी फास्ट बॉलर जसप्रीत बुमराचें पुनरागमन जावपाक शकता.

फाटीचे दुखापतींतल्यान बरो जावपाचे वाटेर आशिल्लो जसप्रीत सध्या राष्ट्रीय क्रिकेट अकादमींत सराव करता. फाटीचे दुखापतीन परतून तकली वयर काडूंक ना जाल्यार तो ऑस्ट्रेलिये आडच्या दोन टॅस्टींनी खेळपाक शकता.