भांगरभूंय | प्रतिनिधी
भांगरभूंय । खेळां मेज
पणजीः नवी दिल्ली हांगच्या आंबेडकर स्टेडियमाचेर शेनवारा जाल्ले सेकंड डिव्हिजन विभागीय आय लीग सर्तींत गोंयच्या स्पोर्टींग क्लब दी गोवाक एकसुऱ्या गोलान हार खावची पडली.
खेळाच्या पयल्या हाफांत दोनूय पंगडांचे गोल यत्न फळादीक जावपाक शकले नात. खेळ सोपपाक 8 मिनटां आसताना स्पोर्टींगाचेर गोल पडलो. रमेश छेत्री हाणे व्हो गोल केलो. ह्या दोनूय पंगडां मदीं हाचे पयलीं जाल्ली मॅच 1-1 अशी ड्रॉ जाल्ली. स्पोर्टिंगाची ही सेगीत तिसरी हार आसा. हे हारीक लागून आतां तांचें 8 मॅचींतल्यान 10 गुण जाल्यात. सुदेवान शेनवारची ही मॅच जिखून 8 मॅचींतल्यान 11 गुण मेळयल्यात. गुण क्रमवारींत ते चवथे सुवातेर आसात. एफसी बेंगळुरू युनायटेड 19 गुणानी पयले सुवातेर आसा
स्ट्रायकर अॅलिस्टर अँथनी आनी मीडफिल्डर जॉयसन गांवकार हांणी सुरवेक चाल रचून सुदेवाचो बचाव फोडपाचो केल्लो यत्न सफळ जालो ना. 23 व्या मिनटाक स्पोर्टिंगाक गोल करपाची संद मेळल्ली. मात कुणाल कुंडयकार हाच्या क्रॉसाचेर गोल करपाक अॅलिस्टर वेळार पावपाक शकलो ना आनी ही संद गेली. हाफ टायमा पयलीं जॉयसन हाणे रोहन रॉड्रिग्सा कडेन बॉल दिलो मात रोहनाचे टायमींग चुकलें आनी बॉल गोलपोस्टा वयल्यान गेलो.
दुसऱ्या हाफांत सुदेवान रणनिती बदलून आक्रमणाक सुरवात केली. स्पोर्टिंगाचो गोलकी डायलन डिसिल्वा हाणे तीन फावट तांचें आक्रमण परतून लायलें. सेंटर बॅक जॉयनर आनी धीरज चौहान हांणी बरो खेळ केलो मात तांच्या यत्नांक येश मेळ्ळें ना. 82 व्या मिनटाक सोर्टिंगाचेर गोल पडलो. दावे वटेन आयल्ला बॉलाचेर ताबो मेळोवन रमेश छेत्री व्हो निर्णायक म्हत्वाचो गोल केलो. निमण्या मिनटांत डॉयल आल्वेस आनी आकेराज मार्टिन्स हाणी गोल बोरोबोरी करपा खातीर केल्ले यत्न येसस्वी जाले नात. सोर्टींग दी गोवाची फुडली मॅच मंगळाकाक मुंबय जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
