भांगरभूंय | प्रतिनिधी
दयानंद सोपटेचो आरोप; फॅमिली राज हाडून ती बंद केल्ल्याचो दावो
भांगरभूंय । प्रतिनिधी
पणजीः म्हापसा अर्बन बँके वयल्यान भाजपान काँग्रेसीचो उत्तर गोंयचो उमेदवार अॅड. रमाकांत खलप हांचेर आरोप करपाचें चालूच दवरलां. खलप हांणी गरिबांच्या पयशांचेर बँक उबी केली आनी तातूंत फॅमिली राज हाडून ती बंद केली. खलपान उपरांत बार्देस बाजार सुरू केलो, पूण थंय लेगीत किजिलां चलतालीं. बार्देस बाजाराच्या संचालकांनी म्हापशें अर्बनाची आवतिकाय पळयली आनी ती बरे तरेन चलची हे खातीर खलपाचें फॅमिली राज सोंपयलें, असो दावो भाजपाचे सचीव आनी आदले मांद्रेंचे आमदार दयानंद सोपटे हांणी केलो.
म्हापसा अर्बन बँके वयल्यान भाजप आनी अॅड. खलप हांचे मदीं आरोप- प्रत्यारोप चालूच आसात. म्हापसा अर्बन बँकेचेर जाय तेन्ना चर्चा करपाक आपूण तयार आसा, अशें आव्हान अॅड. खलप भाजपाचे उत्तर गोंयचे उमेदवार श्रीपाद नायक हांकां दीत आसात. हे फाटभुंयेर भाजप फुडारी सोपटे हांणी परतून एकदां अॅड. खलप हांकां लक्ष्य केला.
पेडणें, दिवचल ह्या सारकिल्ल्या म्हालांतल्या गांवगिऱ्या वाठारांतल्या लोकांचें पयशे घेवन खलप हांणी म्हापसा अर्बन बँक सुरू केली. सुरवेक बरी चलयली आनी भारतीय रिजर्व्ह बँके कडल्यान मस्टी स्टेटस ही वळख लेगीत मेळयली. पूण खलप हांणी बँकेची उदरगत करपाचें सोडून लोकांचे पयशे आनी बँक दोनूय बुडयली. गरिबांच्या पयशांचेर उबी जाल्ले बँकेंत अॅड. खलप चॅयरमन, घरकान्न वेवस्थापकी संचालक, भाजे आनी हेर सोयरे संचालक मंडळाचेर आशिल्ले, असो आरोप सोपटे हांणी केलो. सोपटे हांणी सांगलें, अॅड. खलप हांणी आदीं बंद जाल्ले म्हापसा अर्बन बँकेचे फांटे परतून चालीक लावचे आनी ठेविदारांचे जितलें रीण आसा, तांचो एकेक पयसो परत करचो. उपरांतूच ह्या विशयाचेर चर्चा करपाचें आव्हान दिवचें. आपूण आदलो कायदो मंत्री आशिल्लो अशे झेत मारपी अॅड. खलप हांणी गोंयच्या गरीब लोकां खातीर मंत्री म्हूण खंयचे कायदे हाडल्यात ते सांगचे, अशें सोपटे हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
