भांगरभूंय | प्रतिनिधी
राज्यांत लाखभर लोकांनी केलो योगा
पणजी : भलायकी आनी संतुलीत जिविता खातीर योग हो फकत कार्यावळी खातीर न्हय जाल्यार तो दर एकल्याच्या जिविता खातीर आसा. योगा इन एव्हरी होम, योगा इन एव्हरी स्कूल, योगा इन एव्हरी वर्क प्लेस जावन तो गोंयकारांच्या जिणे पद्दतिचो भाग जावपाक जाय, असो उलो मुख्यमंत्री डॉ. प्रमोद सावंत हांणी मारला. ताळगांवां डॉ. श्यामाप्रसाद मुखर्जी स्टेडियमार संवसारीक योग दिसाच्या उक्तावणा उपरांत ते उलयताले. हे कार्यावळीक केंद्रीय राज्यमंत्री श्रीपाद नायक, खेळां मंत्री रमेश तवडकार, मुखेल सचीव डॉ. व्ही. कांडावेलू आनी हेर मानेस्त हाजीर आशिल्ले.
देशाच्या हेर राज्यां भशेन गोंयांत आयज १५० परस चड सुवातांचेर योग दिसाच्यो कार्यावळी जाल्यो. मुखेल कार्यावळ मुखर्जी स्टेडियमाचेर जाली. हे कार्यावळीत मुख्यमंत्री सावंत, श्रीपाद नायक आनी हेरांनी योगासना केली. उक्तावणा उपरांत प्रधानमंत्री नरेंद्र मोदी हांचें भाशण प्रसारीत केलें.
योगा ही भारतान संवसाराक दिल्ली देण आसा. योगाक लागून शरीर घटमूट रावपा सयत एकाग्रतेच्या प्रमाणांत भर पडटा. जिवितांतलो ताण सोंसपाची तांक वाडपा सयत भावनीक नदरेन मनीस घटमूट जाता. सरकारान लोकांची भलायकी सुदारपा खातीर हेल्थ विथ आयुर्वेदा उपक्रम सुरू केला. समाज भलायकेचे नदरेन सक्षम जावपा खातीर योगा इन एव्हरी डे लायफ जावपाची गरज आसा, अशें मुख्यमंत्री सावंत हांणी सांगलें.
प्रधानमंत्री नरेंद्र मोदी हांचे फुडारपणा खाला योगा हें आतां जन आंदोलन जालां. योगा हो फकत व्यायाम न्हय जाल्यार संतुलीत जिविता खातीरची एक पद्दत आसा, अशें श्रीपाद नायक हांणी म्हणलें. विकसीत भारताच्या उबारणेंत दर एकल्याची भलायकी आनी विचार म्हत्वाचे थारतात. भलायकी तशेंच विचारा खातीर योगा करप गरजेचें. योगा हो भारताचो ब्रँड आसा, अशें तवडकार हांणी सांगलें.
दरेकी म्हालांत जाल्ले कार्यावळींत वाठारांतले आमदार तशेंच मंत्र्यांनी वाटो घेतलो. कॉंग्रेस आमदार कार्लूस फेरेरा हांणी पेडें, म्हापश्यां योग दिसाचे कार्यावळींत वाटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
