भांगरभूंय | प्रतिनिधी
काँग्रेस करतली आंदोलन
पणजी, प्रतिनिधी: ये तो होना ही था! लोकसभा सोंपली आनी भाजप सरकारान इंधनाचेर व्हॅट वाडयलो. पेट्रोलाच्या दरांत लिटराचेर १ रुपया आनी डिझेलाच्या दरांत लिटराचेर ३६ पयशे वाडयल्यात. भाड्याचेर जाल्ली वाड फाटीं घेयात. मुख्यमंत्री डॉ. प्रमोद सावंत हांणी इव्हेंट आयोजनाचेर निरर्थक खर्च करिनासतना काटकसरीचे उपाय आपणावचे, अशें विरोधी पक्ष फुडारी युरी आलेमाव हांणी म्हणलां.
सरकाराक सामान्यांचो कणो मोडपाचो आसा. हालींच तांणी वीज दर वाड केल्या. आयज इंधनाचो दर वाडयलो. विजेच्या दर वाडीक लागून जनतेचेर कसोच परिणाम जावचो ना अशी डॉ. सावंत हांची प्रतिक्रिया भाजप सरकारचो गरीब विरोधी अजेंडा उक्ताडार हाडटा. सगळ्यांत भ्रश्ट भाजप सरकारान केल्लें इंधन दर वाडीचें म्हाका अजाप दिसना. कार्यावळींचेर हजारांनी रुपया खर्च करून जोडपाचेर भाजपवाल्यांचीच भर आसता. राज्याची तिजोरी खाली जाल्ल्यान निधी एकठांय करपा खातीर आनी चड इव्हेंट आयोजीत करपाक ही दरवाढ केल्या. भाजप सरकाराक सामान्यांच्या त्रासाची पर्वा ना, असो आरोप युरी आलेमाव हांणी केला.
आदले मुख्यमंत्री सर्गेस्त मनोहर पर्रीकार हांणी गोंयकारांक व्हॅट कापून पेट्रोलाचें दर लिटर ६० रुपयां सकयल दवरपाचें आस्वासन दिल्लें. दुर्दैवान ‘पर्रिकरांचे राजकीय वारसदार’ म्हणपी डॉ. प्रमोद सावंत हांणी व्हॅट वाडोवन तांचे उलट केलां, अशेंय आलेमाव हांणी मुखार म्हणलें.
शासनान जर ही दर वाड फाटीं घेवंक ना जाल्यार आमी आंदोलन करतले. मुख्यमंत्री डॉ. प्रमोद सावंत हे गोंयकारांक ते रस्त्यार येवपाक दिवचे नात अशी आस्त आसा, अशें आलेमांव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
