भांगरभूंय | प्रतिनिधी
कलाकार
——————————-
मॉडेल जावप सोंपें न्हय. तातूंत स्वताक बरें तरेन मेन्टेन करचें पडटा. त्या खातीर आहाराचें बंधन पाळचें पडटा. दिसता तें खावपाक मेळना. व्यायाम, जीम करचें पडटा.
गोंयांत साबार कलाकार जल्मल्यात. नृत्यकार, संगीतकार, चित्रकार, फॅशन डिझायनिंग, गायन आदीं मळांचेर. तातूंतलेच एक मळ म्हणल्यार मॉडेलिंग . मॉडेलिंगात भाग घेवन गोंयातले तरणाटे बरें तरेन मुखार सरतना दिसतात. असोच मूळ दोडामार्ग, विर्डी, पूण केरी गांवांत ल्हानाचो व्हड जाल्लो सुरज कृष्णा गांवस. ताणें विज्ञान शाखेत पदवी मेळयली आनी उपरांत आपत्कालीन वैजकी तंत्रज्ञ (Certified Emergency medical technician) अभ्यासक्रम केलो. सध्या तो आपत्कालीन वैजकी तंत्रज्ञ (108 emergency medical service) म्हूण चार वर्सां जालीं, काम करता.
महाविद्यालयांत शिक्षण घेतना ताची उंचाय आनी ताचे बरें व्यक्तिमत्व पळोवन ताच्या इश्टानी ताका मॉडेलिंगांत यत्न कर अशें सुचयलें. तशें ताणें महाविद्यालयांत आसतना ल्हान- व्हड फॅशन शो कार्यावळींत वांटो घेतिल्लो. तांणे शिक्षण घेतानाच मॉडेलिंगांत प्रवेश घेतलो आनी ताका ह्या मळाची आवड लागली. तेन्ना ताणें थारायलें हांव फुडें मॉडेलिंगात कितें तरी करतलों. तांणे हाची सुरवात 2018 वर्सां केली. तेन्ना सावन तांणे ऑडिशना खूब दिल्लीं, पूण कांय कडेन तो रिजॅक्ट जालो. इतलें जावन आपणें हार मानूंक ना, अशें तांणे सांगलें.
एबी प्राॅडक्शन पंगड आयोजीत पेडणें हांगा जाल्या मिस्टर पेडणे 2018 हे कार्यावळींत ताणें वांटो घेतिल्लो. पूण तेन्ना थंय ताका इनाम मेळ्ळें ना. उपरांत दुसरे वर्सां ताणें मिस्टर पेडणे 2019 वांटो घेतलो आनी तांतूंत तो जैतिवंत जालो. एबी प्रोडक्शन पंगडान सालसेट बीच रिसॉर्टांत घेतिल्ल्या मिस्टर गोंय 2019 हे कार्यावळींत ताणें वांटो घेतलो आनी हातूंत तो निमाणे फेरयेंत पावलो. मिस्टर पाॅप्युलर हो पुरस्कार ताका फावो जाले. flipkart face for garments तशेंच गोंय फॅशन वीक सारक्या कार्यावळींनी तांणे सादरीकरण केला. तशेंच वी बॉयज सारक्या कपड्यांच्या ब्रँडा खातीर फोटोशूट केला.
ताच्या ह्या प्रवासांत मुखार सरपाक ताच्या इश्टांनी सदांच ताची उर्बा वाडयली आनी पालकांनी प्रेरणा दिली. मिस्टर इंडिया सर्तींत वांटो घेवन आंतरराष्ट्रीय पांवड्यार भारताचें प्रतिनिधित्व करप हें ताच्या जिणेंतलें सगळ्यांत मोठे ध्येय आसा अशें तांणे सांगलें.
एक मॉडेल जावप सोंपें न्हय. तातूंत स्वताक बरें तरेन मेन्टेन करचें पडटा. त्या खातीर आहाराचें बंधन पाळचें पडटा. दिसता तें खावपाक मेळना. व्यायाम, जीम करचें पडटा, अशें तांणे सांगले. ह्या मळार म्हाका आवड आशिल्ल्यान हांव यत्न करीत रावलों. साबार सर्तीनी वांटो घेतलो म्हणून आयज हांव यश मेळोवपाक पावलो. इतलेंच न्हय तर आजून म्हजे जिणेंत म्हाका खूब किदें करपाक जाय. येस सोंपेपणान मेळना. ताचे खातीर खूब कश्ट करचे पडटात, अशें ताणें सांगलें. @i_m_suraj__ हो ताचो इंस्टाग्राम. तुमीय ताका फॉलो करपाक शकतात.
–
प्राची गांवकार
सुर्ल- सत्तरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
