भांगरभूंय | प्रतिनिधी
पणजी ः हस्तकला खात्या वतीन गोंयकारां खातीर णव तरेच्यो येवजण्यो चालीक लायतात. मात तांतल्यो चारूच येवजण्यो चालू आसात. हेर पांच येवजण्या खातीर फाटल्या तीन वर्सां सावन एकूय अर्ज येवंक ना. हाचें कारण कितें? असो प्रस्न आमदार जीत आरोलकार हांणी प्रस्न जापेच्या काळांत सभाघरांत विचारलो. तेन्ना मंत्री रवी नायक हांणी, ‘ते कित्याक येनात हें हांव कशें सांगूं?’ अशी जाप ताका दिली. राज्यांतल्या तरणाट्यांनी हस्तकला खात्याच्या येवजणेचो लाव घेवचो. ताका लागून खात्यान सगळ्या येवजण्यांची योग्य तरेन जागृताय आनी प्रसार करचो.
येवजण्यांचो लाव घेवन तरणाट्या चले-चलयांक वेवसाय उबे करपा खातीर उर्बा दिवपाक जाय, अशें आमदार जीत हांणी म्हणलें.
लोकांनी निवडून दिल्ल्या आमदारांनीच आपापल्या मतदारसंघांतल्या तरणाट्यांक येवजण्यांचो लाव घेवचे खातीर खात्याकडेन हाडचें. तांची ती जापसालदारकी. तांणी यत्न केले उपरांत, तरणाटीं खात्या कडेन आयल्यार तांकां उर्बा आनी प्रशिक्षणूय दितले, अशेंय मंत्री रवी नायक हांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
