भांगरभूंय | प्रतिनिधी
फोंडें नगरपालिका मंडळाचे बसकेंत निर्णय
फोंडें: फोंडें पालिका वाठारांतली येरादारी समस्या सोडोवपा खातीर ‘पे पार्कींग’ लागू करपाचो निर्णय मंगळारा नगरपालिकेचे बसकेंत घेतलो. दुचाकी खातीर एका वरा खातीर 5 रुपया जाल्यार चारचाकी मोटारी खातीर वराक 10 रुपया आकारतले. पे पार्कींग करपा खातीर गरजेची प्रक्रिया सुरू केल्या.
नगराध्यक्ष रितेश नायक हांच्या मार्गदर्शना खाला जाल्ले बसकेंत थळावे आमदार आनी कृशी मंत्री रवी नायक, मुख्याधिकारी योगीराज गोसावी, नगरसेवक रॉय नायक, व्यंकटेश उर्फ दादा नायक, आनंद नायक आनी हेर नगरसेवक हाजीर आशिल्ले.
पत्रकारांक म्हायती दितना नगराध्यक्ष रितेश नायक हांणी वारखंड्यां हनुमान देवूळ ते वयलो बाजार आनी तिस्क-फोंडें हांगासरलें न्यायालय ते दादा वैद्य मेरेन पे पार्कींग करपा खातीर सर्वेक्षण केलां. रोखडेंच विवीध खात्याच्या अधिकाऱ्यांक घेवन परतून पळोवणी करुनूच अंमलबजावणी करतले अशें तांणी सांगलें.
फोंडें पालिकेन कांय म्हयन्यां पयलीं पावणी करून मंजूर केल्ली भाडेंपट्टी वयल्या 9 दुकानांची प्रक्रिया रद्द करपाचो निर्णय मंगळारा घेतलो. सदर प्रक्रिया वेवस्थीत जावंक नाशिल्ल्याचें दिसून आयलें. ताका लागून पालिका मंडळान प्रक्रिया रद्द करून परतून दुकानाची पावणी करपाचो निर्णय घेतिल्ल्याचें नगराध्यक्ष रितेश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
