भांगरभूंय | प्रतिनिधी
म्हापशें, प्रतिनिधी ः येरादारी पुलीस खात्याच्या तीन कर्मचाऱ्यांक पुलीस खात्यान सेवेंतल्यान निलंबीत केल्यात. ह्या कर्मचाऱ्यां मदीं एक सहाय्यक बायल पुलीस उपनिरिक्षक आनी दोन हवालदारांचो आस्पाव आसा. हलींच हणजुणा येरादारी पुलीस खात्यांत बदली जाल्ल्या 11 पुलिसांत निलंबीत केल्ले कर्मचारी आशिल्ले.
बायल सहाय्यक पुलीस उपनिरिक्षक आनी दोन पुलीस हवालदारांक सेवेंतल्यान निलंबीत केल्यात. येरादारी पुलीस अधीक्षकांनी शुक्रारा सांजवेळार उसरां वायरलेस वरवीं ह्या कर्मचाऱ्यांक निलंबीत करपाचो आदेश जारी केला. सध्या हें कर्मचारी पणजी आनी मडगांव येरादारी पुलीस खात्यांत सेवा दिताले.
ह्या म्हयन्याचे सुरवेक तेन्नाच्या येरादारी पुलीस अधीक्षकांनी हणजूणा येरादारी पुलीस खात्यांतल्या 11 कर्मचाऱ्यांची बदली केल्ली. तातूंत सहाय्यक उपनिरिक्षक, हवालदार आनी कॉन्स्टेबल अशा पुलीस कर्मचाऱ्यांचो आस्पाव आशिल्लो. त्या वेळार लेगीत ह्या बदली फाटलें कारण वायरलेस आदेशांत स्पश्ट करुंक नाशिल्लें. तशेंच निलंबन आदेशातय कारण दिवंक ना.
सेवेंतल्यान निलंबीत जाल्ल्या पुलीस कर्मचाऱ्यांचो व्हिडियो व्हायरल करपाच्या नांवान एका मनशान छळ चालू केल्लो. तशेंच उल्लेख केल्ल्या मनशान कर्मचाऱ्यां कडल्यान खंडणी घेवपाचीय मागणी केल्ली. हे विशीं हणजुणा पुलीस स्टेशनाचेर संबंदीत पुलिसांनी लेखी कागाळ दिली. इतलेंच न्हय तर ह्या तिगूय कर्मचाऱ्यांचो सेवा दितनाचो व्हिडियो सोशल मिडियाचेर व्हायरल जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
