भांगरभूंय | प्रतिनिधी
फोंडें: फोंडें शारांतली येरादारीची समस्या सोडोवपा खातीर फोंडें पालिका, येरादारी पुलीस तशेंच फर्मागुडयेच्या गोंय अभियांत्रिकी महाविद्यालयांतल्या अधिकार्यांनी पळोवणी केली. शारांतल्या जायत्या रस्त्यांचेर सांजेवेळार येरादारी कोयंडीचो प्रस्न गंभीर जाला. ताका लागून शारांतल्या रस्त्यांचेर अचकीत आडावन प्रवाशी घेवपी बसी संबंदी तोडगो काडटले.
फोंडेंचे नगराध्यक्ष आनंद नायक, मुख्याधिकारी योगीराज गोसावी, गोंय अभियांत्रिकी महाविद्यालयाचे प्रमुख डॉ भादुरिया, प्राचार्य पूर्णानंद सावयकार, प्राचार्य विल्मा, येरादारी पुलीस खात्याचे सहाय्यक उपनिरीक्षक महेश सांगोडकार आनी हेर मानेस्त हजर आशिल्ले.
फोंडेंच्या आदल्या बस स्टॅण्डावेल्यान उसगांव आनी बेतोडा मार्गाव वचपी प्रवासी बसी शांरात जायत्या सुवातांचेर रस्त्यार थारून प्रवासी घेतात. ताका लागून येरादारी कोयंडीचो प्रस्न निर्माण जाता. तशेंच वयल्या बाजारांत प्रावशी बसी जायते फावट थारिल्ल्यान येरादारी कोयंडी जायत आसता. तशेंच शारांत एकोडो मार्ग तयार करून येरादारी सुरळीत करपाचो यत्न करतले.
नगराध्यक्ष आनंद नायक हांणी, शारांतल्यो येरादारी समस्या सोडोवपा खातीर बिरेस्तारा खास पळोवणी केली. जायत्या सुवातांचेर रस्त्याच्या दोनूय वटांनी वाहनां पार्क केल्ल्यान येरादारी कोयंडी जायत आसता. तशेंच रस्त्याच्या मदल्या भागांत रस्त्यार प्रवाशी बसी रावतात आनी प्रवाशांक घेतात. तशेंच कांय रस्त्यांवेल्यान एकोड्या मार्गान येरादारी सुरू करतना गरजेच्या चालकांक दिका दाखोवपी तखटे लायतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
