भांगरभूंय | प्रतिनिधी
प्रधानमंत्री नरेंद्र मोदी हांचो हो नैतीक पराभव: विरियातो फर्नांडीस
पणजी: येता ते 2027 चे विधानसभा वेंचणुकेंत गोंयांत निश्चीतपणान काँग्रेसीचें सरकार येतलें असो विस्वास विरोधी पक्ष फुडारी युरी आलेमांव हांणी उक्तायला. दक्षीण गोंय मतदारसंघांत काँग्रेसीच्या जैता उपरांत तांणी ही प्रतिक्रिया उक्तायली. गोंयांत आतां भाजपाच्या विरोधांत वातावरण तयार जावपाक लागलां, अशें तांणी म्हणलें.
भारतीय जनता पक्षान सत्ता आनी पयशाचो वापर करीत प्रचार केल्लो. प्रधानमंत्री नरेंद्र मोदी हांची वास्को जाहीर सभा जाल्ली. भाजपाचे तुळेेन काँग्रेसीच्यो जाहीर सभा जाल्यो नात. सत्तेचो गैरवापर करून लेगीत भाजपाक दक्षीण गोंयांत जैत मेळप शक्य जालें ना. भारतीय जनता पक्षाचो हो नैतीक पराभव आसा अशें युरी आलेमांव हांणी म्हणलें. भारतीय जनता पक्षान ‘अब की बार 400 पार’, अशी घोशणा दीत प्रचार केल्लो. प्रत्यक्षांत तांकां 300 परस उण्यो सुवातो मेळ्ळ्यो. तशेच दक्षीण गोंयची सुवात जिखप तांकां शक्य जावंक ना, अशें युरी आलेमांव हांणी म्हणलें.
राज्यांत आतां भाजप विरोधांत वातावरण तयार जावपाक लागलां. दक्षीण गोंयांत भाजपा कडेन भोवसंख्य आमदार आसतना लेगीत पक्षाच्या उमेदवाराचो पराभव जालो. काँग्रेस पक्षाचेर गोंयच्या जनतेचो विस्वास आसा. फुडले विधानसभा वेंचणुकेंत काँग्रेस पक्षाचें जैत निश्चीत आशिल्ल्याचें संकेत दिवपी हो निकाल आसा अशें युरी आलेमांव हांणी म्हणलें.
मंत्रीमंडळान केल्लो दक्षीण गोंयांत प्रचारः विरियातो
प्रधानमंत्री नरेंद्र मोदी हांची वास्को जाहीर सभा जाल्ली. तशेंच गोंयच्या पुराय मंत्रिमंडळान दक्षीण गोंयांत प्रचार केल्लो. तरी लेगीत भाजप उमेदवाराचो पराभव जालो. हो प्रधानमंत्री नरेंद्र मोदी हांचो नैतीक पराभव आसा, अशें विरियातो फर्नांडीस हांणी म्हणलें.
सरकार खंयच्याय खिणाक कोसळटलें: विजय सरदेसाय
मडगांवां भाजपाची आघाडी उणी जाले उपरांत खूबशा मंत्र्यांनी म्हाका परबीं दिवपा खातीर फोन केले. हें सरकार खंयच्याय खिणाक कोसळटलें. सरकार आपशीच कोसळटलें, विरोधी पक्ष ते पाडपाचे येत्न करचे नात, अशें गोवा फॉरवर्डाचे अध्यक्ष आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
