भांगरभूंय | प्रतिनिधी
‘आय सायबा!’ चित्रपटान लागून मेळ्ळो भोवमान
पणजी: कोंकणी चित्रपट मळार अभिमानाची अशी एक म्हत्वाची कामगिरी ’आय सायबा!’ ह्या चित्रपटान केल्या. ह्या चित्रपटाक लागून युनायटेड किंगडमाच्या (यूके) चित्रपट वर्गीकरण प्रक्रियेंत पयलेच फावट कोंकणीक एक स्वतंत्र भास म्हणून मान्यताय मेळ्ळ्या. हाका लागून फुडारांत कोंकणी चित्रपटांक आंतरराष्ट्रीय पांवड्यार वाटप आनी वर्गीकरणा खातीर नवे मार्ग उक्ते जातले.
‘आय सायबा!’चे लेखक, दिग्दर्शक आनी नृत्यदिग्दर्शक स्टॅन्ली मेनिनो डिकोस्टा हांणी ही म्हायती दितना सांगलें, हो फकत चित्रपटाचो न्हय तर पुराय कोंकणी भास आनी गोंयच्या पुराय चित्रपट मळावेलें जैत. आतां मेरेन युकेच्या सेन्सर आनी वर्गीकरण प्रक्रियेंत कोंकणी खातीर स्वतंत्र भाशेचो पर्याय नाशिल्लो. मात ‘आय सायबा!’च्या प्रमाणन प्रक्रिये मजगतीं कोंकणीचो स्वतंत्र भाशाश्रेणींत आसपाव केलो.
१९ जून सावन युकेच्या विवीध चित्रपटघरांनी ‘आय सायबा!’चे प्रदर्शन सुरू जालें. लंडन, हाउन्स्लो, वेम्ब्ली, फेल्थम, इलफर्ड, सावथ रुईसलिप, स्विंडन आनी अबर्डीन हांगा मेळून सुमार ४५ परस चड शो आयोजीत केले. स्नेहा सुपर सावंड निर्मीत आनी स्टॅन्ली डिकोस्टा हांणी तो बरोवन दिग्दर्शित केला.
प्रादेशीक भासांतले चित्रपट संवसारीक पांवड्यार पावल्यार सांस्कृतीक वळख जपपाक मजत जाता आनी थळावी कथा नव्या प्रेक्षकां मेरेन पावता अशेंय तांणी सांगलें. युकेच्या भाशांच्या अधिकृत वळेरेंत आतां कोंकणीचो स्वतंत्र पर्याय उपलब्ध जाला, हो ल्हान दिसपी बदल कोंकणी भाशा आनी चित्रपटसृष्टी खातीर इतिहासीक पावल मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
