यूएसए – दक्षीण

भांगरभूंय | प्रतिनिधी

एसएच्या दक्षीण प्रांतांनी अलाबामा, आर्कन्सा, डॅलवॅर, डिस्ट्रिक्ट ऑफ कोलंबिया, फ्लॉरिडा, जॉर्जिया, कॅन्टकी, लुईजियाना, मॅरीलॅण्ड, मिससिपी, नॉर्थ कॅरॉलिना, ओक्लहोमा, सावथ कॅरॉलिना, टॅनेसी, टॅक्सस, वर्जिनिया आनी वॅस्ट वर्जिया ह्या राज्यांचो आसपाव जाता. दक्षिणेंतल्या ह्या राज्यांनी वेगवेगळ्या संस्कृतायेचें दर्शन घडटा. लॅटीन अमेरिकन, अफ्रिकन अमेरिकन्स, केजन (फ्रँच कॅनेडियन्स), युरोपियन अमेरिकन्स हे विंगड विंगड संस्कृतायेचे लोक ह्या राज्यांनी रावतात. तांच्या भेसांत, भाशेंत तशेंच खावपा-जेवपांत खूब फरक आसा. तशेंच भुगोलीक नदरेन ह्या राज्यांनी आपआपली विशेशताय आसा. यूएसएच्या हेर राज्यांचे तुळेंत दक्षिणेंतल्या राज्यांची अर्थीक स्थिती दुबळी आसा. पूण फ्लॉरिडा सारक्या राज्यांत पर्यटन हो मुखेल वेवसाय आशिल्ल्यान थंयची अर्थवेवस्था सुदारिल्ली आसा.
लोकसंख्या – विकिपिडिया प्रमाण दक्षीण यू.एस.एंतल्या राज्यांची सरासरी लोकसंख्या अशी आसा. अलाबामा – 5,039,877, आर्कन्सा – 3,013,756, डॅलवॅर – 1,018,396, डिस्ट्रिक्ट ऑफ कोलंबिया – 670,050, फ्लॉरिडा – 22,244,823, जॉर्जिया – 10,711,908, कॅन्टकी – 4,509,342, लुईजियाना – 4,657,757, मॅरीलॅण्ड – 6,177,224, मिससिपी – 2,963,914, नॉर्थ कॅरॉलिना – 10,698,973, ओक्लहोमा – 4,019,800, सावथ कॅरॉलिना – 5,282,634, टॅनेसी – 6,916,897, टॅक्सस – 29,145,505, वर्जिनिया – 8,683,619 आनी वॅस्ट वर्जिया – 1,793,716.
मार्टीन लुथर किंग – ज्युनियर मार्टीन लुथर किंग हांचो जल्म अटलांटांत 15 जानेवारी 1929 दिसा जालो. 1960च्या अदमासाक वर्णभेदा आड तांणी चळवळ केली. 1968 वर्सा तांची हत्या केली. नागरी हक्क चळवळी उबारपी ज्युनियर मार्टीन लुथर किंग हांकां वर्णभेदा आड चळवळीचे जनक मारतात. तांकां नोबॅल शांतिकायेचो पुरस्कार फावो जाला.
कापसाचें पीक – दक्षीण यू.एस.एंत कापसाची लागवड मोट्या प्रमाणांत जाता. एका काळार अफ्रिकन-अमेरिकन गुलामांनी कापसाची लागवड केल्ली. ह्या प्रांताचे अर्थवेवस्थेंत कापूस हें म्हत्वाचें पीक थरलां. वस्त्रोद्योगांत कच्चो माल म्हणून कापसाचो वापर जाता. दक्षीण आनी पश्चीम यू.एस.एंत वर्साक सुमार 21 बिलियन कापसाचें उत्पादन जाता.
फ्लॉरिडा – दक्षीण यू.एस.ए च्या वेगवेगळ्या राज्यां मदीं फ्लॉरिडा राज्य खूब प्रसिद्ध आसा. यू.एस.ए देशांतले लोक तशेंच पर्यटक ह्या राज्यांतल्या दर्यावेळांक भेट दितात. मियामी दर्यावेळ, सिएस्ता दर्यावेळ, सांता रोजा दर्यावेळ, मार्को आयलण्ड, सेंट जॉर्ज आयलण्ड हीं कांय लोकप्रिय पर्यटन थळां ह्या राज्यांत आसात. मियामी शारांत वेवसाय-धंदो करूंक क्युबा, मध्य अमेरिका आनी हेर करेबियन जुंव्यावेले लोक स्थलांतर करतात. फ्लॉरिडांतल्या बूश गार्डन्स टांपा बे ह्या वाठारांत कुम्बा रोलर कोस्टर आसा. स्टीलाच्या रोलर कोस्टराचो आनंद घेवंक भुरगीं तशेंच व्हडलीं ह्या रोलर कोस्टराक भेट दितात.
ऍवरग्लेड्स – ऍवरग्लेड्स राष्ट्रीय उद्यान फ्लॉरिडांत येता. अमेरिकन मानगें, मॅनटी, फ्लॉरिडा पॅन्थर हे सारकिलीं ना जावपाक पाविल्लीं जनावरां ह्या उद्यानांत आसात. तांचें रक्षण करपाचें काम हें उद्यान करता. एक संवसारीक दायज सुवात म्हणून ह्या उद्यानाक नामना मेळ्ळ्या.
संस्कृती – मॅरीलॅण्ड, वर्जिनिया, नॉर्थ कॅरॉलिना, सावथ कॅरॉलिना आनी जॉर्जिया हे राज्य ब्रिटीश वसाहती खाला आशिल्ले. इंग्लंडांतली परंपरा, जिणे पद्दत ह्या राज्यांनी दिसता. लुईजियाना राज्यांत केजन म्हणल्यार फ्रँच उलोवपी लोकांची संख्या भरपूर आसा. 18व्या शेंकड्यांत ह्या लोकांनी कॅनडांतल्यान लुईजियानांत स्थलांतर केल्लें. संगीत, जेवण-खाण तशेंच नगर, शारांच्या नांवांनी फ्रँच प्रभाव दिसता.
संगीत – दक्षीण यू.एस.ए प्रांत संगिता खातीर खूब प्रसिद्ध आसा. सांस्कृतीक मिश्रणाचें दर्शन घडोवपी हें संगीत आसा. न्यू ऑर्लिन्स आनी लुईजियानाच्या कांय भागांनी जॅज आनी केजन संगिताची सुरवात जाली. ब्लूग्रास आनी कण्ट्री संगिताची सुरवात नॅशवील आनी मॅमफीस ह्या शारांनी जाली. ह्या संगिताक पुराय देशांत लोकप्रियता मेळ्ळी तशेंच संवसारांतल्या हेर देशांनी हें संगीत पावलें.
खाणां-जेवणां – टायडवॉटर, लोकण्ट्री, केजन, फ्लोरिबियन अशीं विंगड विंगड प्रांतीय खाणां-जेवणां दक्षीण यू.एस.एंत मेळटात. टमाट, मको, भेंडो, वांयगें हे जिनस ह्या खाणां-जेवणांनी चड वापरतात. तशेंच तांतयां, पोर्क, चिकन मोट्या प्रमाणांत खातात. बार्बेक्यू चिकन आनी ताचे बरोबर व्हायट बार्बेक्यू सॉस हें अलाबामाचें लोकप्रिय खाण. फ्रायड चिकन, चिकन फ्रायड स्टेक, फ्रायड कॅटफीश, ब्रॅड पुडींग, बटर बिन्स, बेक्ट कणंगां, बटरमिल्क बिस्किट्स अशीं वेगवेगळीं पारंपारीक खाणां दक्षीण यू.एस.एंत मेळटात.

स्नेहा सबनीस
9923633789