यूएईंत ब्रम्हेशानंद स्वामीचो भोवमान

भांगरभूंय | प्रतिनिधी

भांगरभूंय । प्रतिनिधी
पणजीः आध्यात्मीक धर्मगुरू स्वामी ब्रम्हेशानंत हांका भारत सरकाराचो पद्म पुरस्कार फावो जाल्ले खातीर संयुक्त अरब अमिरातींतल्या आंतरराष्ट्रीय सद्गुरू फावंडेशन कांवसिलान यूएईंतलत्या संस्था तशेंच आध्यात्म मोगींच्या उपस्थितींत भोवमान केलो.
भारतीय संस्कृती आनी सांस्कृतीक दायज फुडें व्हरपा खातीर आनी अध्यात्माचें दायज फुडले पिळगे मेरेन व्हरपा खातीर यूएई आनी संवसारांतले भारतीय जें योगदान दितात ताची स्वामींनी तोखणाक केली. आपली जीण सगल्यांनी समजून घेवपाक जाय. जिणेतले आध्यात्मीक पैलू स्थीर करपा खातीर आपलें मन तयार करपाक जाय अशें तांणी आपल्या आशिर्वचनांत सांगलें.
ह्या सुवाळ्याक यूएईतल्या इंडियन पीपल फोरमाचो अध्यक्ष जितेंद्र वैद्य, स्वामीनारायण संस्थेचो प्रवण देसाय, हिंदू मंदिराचे संचालक, भारत सेवक संचालक आनी हेर मानेस्त हाजीर आशिल्ले. स्वामीचे हस्तुकीं मानेस्तांचो आनी मुखेल संस्थाच्या प्रतिनिधींचो संयुक्त अरब अमिरातींत ताणी चलयल्ले समर्पीत सेवे खातीर भोवमान केलो. भारतीय लोक मंच, अबुधाबीचो अध्यक्ष रघुजी, गुजराती समाजाची अर्चनाजी, रिद्धीजी आनी दीप्तीजी, मारवाडी समाजाचे आनंद गुप्ता, रमेश देव, राकेश मेहता, बिहारी समाजाचे दिवाकर प्रसाद, अबुधाबी महाराष्ट्र मंडळाचो प्रसाद आनी डॉ पल्लवी बारटक्के, सिंधी समाजाचो गौतम नाथवानी हांचो हातूंत आसपाव आशिल्लो. आमची संस्कृती तिगोवन दवोरले खातीर ब्राम्हीदेवीन यूएईंतल्या लोकांची तुस्त केली.
सुरवेक मीलन महादेव फडते हिणे स्वामीक येवकार दिलो. मेधा परेश हळर्णकारान सद्गुरू पूजन केलें. यूएई आनी भारताच्या राष्ट्रगीतान कार्यावळीचो समारोप केले. दिनेश लामगांवकारान उपकार मानले.