भांगरभूंय | प्रतिनिधी
पणजी, डीआयपीः युवा पणजीन गोंय सरकाराच्या राजभाशा संचालनालयाच्या जोडपालवान एका दिसाची “प्रशासनांत कोंकणीचो वापर” ही जागृताय कार्यावळ घडोवन हाडली. उक्तावणाक मुखेल सोयरे म्हणून डॉ. पद्मनाभ राताबोली, राजभाशा संचालक प्रशांत शिरोडकार, उपसंचालक अनिल सावंत, मुखेल उलोवपी प्रो. डॉ. किरण बुडकुले, युवा पणजीचे अध्यक्ष सर्वेश शेट्ये आनी उपाध्यक्ष सनथ भरणे हे मानेस्त हाजीर आशिल्ले. दो. राताबोली हांणी उलयतना कोंकणी भाशेची गिरेस्तकाय आनी इतिहास सांगलो आनी अशा कार्यावळींची गरज उक्तायली. कार्यावळींत वट्ट 248 जाणांनी वांटो घेतिल्लो. कार्यावळ एकाच वेळार दोन सभाघरांनी जाली. ही कार्यावळ सरकारी कर्मचारी, शिक्षक, विद्यार्थी आनी नागरिकां खातीर आशिल्ली.
सरकारी आनी प्रशासकी कामकाजात आपली मायभास कोंकणी भाशेच्या वापरपाचें म्हत्व पटोवन दिवप तशेंच राजभाशा अधिनेमा विशीं म्हायती आनी कोंकणी भाशेचो वापर केल्यार पत्रवेव्हार प्रभावी कसो जावं येता हाचें म्हत्व पटोवपाचेर भर दिल्लो. संवादात्मक सत्रां वरवीं कोंकणी वापरल्यार प्रशासकी प्रक्रिया कशी सोंपी आनी सुटसुटीत करूं येता, संवाद सुदारूं येता, आनी गोंयकार समाजा कडेन घट संबंद कसो वाडोवंक मेळटा हाची जाणविकाय वांटेकारांक मेळ्ळी.
दामोदर घाणेकार, डॉ. पलिया पंडित अशा वेगवेगळ्या मानेस्तांनी विचार मांडले. ही कार्यावळ प्रशासनांत कोंकणीची भुमिका घटमूट करपाचे दिकेन तशेंच गोंयांत सांस्कृतीक संरक्षण आनी प्रशासकीय कामकाज आनीक प्रभावी आनी परिणामकारक करपा खातीर म्हत्वाची थारली.
समारोप सुवाळ्याचें येवकाराचें उलोवप युवा पणजीचे संस्थापक रघुवीर महाले हांणी केलें. ह्या वेळार प्रुडंट मिडियाचे संचालक प्रमोद आचार्य मुखेल सोयरे म्हूण हाजीर आशिल्ले. तांणी आपल्या भाशणांत युवा पणजीची तोखणाय करतनाच, सगल्या वांटेकारांक दरेक भाशेचो सभाव कसो वेगळो आसता तें सांगलें आनी भाशा चडांत चड लोक वापरता ती आसची आनी प्रमाण वा ग्रांतीक भास वापरपाचेर मात्शी सूट आसल्यारुच तिचो वापर सोंपो आनी व्हड प्रमाणांत जातलो, अशें सांगलें.
उपरांत वांटो घेतिल्ल्यांक प्रमाणपत्रां भेटोवन कार्यावळीचो समारोप जालो. सुत्रसंचालन देविता खुळे आनी मेगन डिसुजा हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
