भांगरभूंय | प्रतिनिधी
पणजी: कुंकळ्ळीचे आमदार आनी विरोधी पक्ष फुडारी युरी आलेमांव हांणी काल (मंगळारा) सुमार 250 गृह आदार लाबार्थ्यांक येवजणेचीं मंजुरी पत्रां भेटयलीं.
म्हारगाय दिसान दीस वाडत आसा आनी जिणेगरजेच्या वस्तूंचे दर सामान्य लोकांक परवडनात अशे जाल्यात. अशे परिस्थितींत ही अर्थीक मजत गृहिणींक घरच्यो गरजो पुराय करपा खातीर मजत करता अशें युरी आलेमांव हांणी सांगलें.
गृहिणींक अर्थीक मजत दिवप हो येवजणेचो हेत आसलो तरी स्वावलंबनाची मोख सदांच आसपाक जाय अशें तांणी सांगलें. बायलांचें सशक्तीकरण करपाक मजत करपी उपक्रमांक चालना दिवपाचो आपणें सदांच यत्न केला, अशें आलेमांव हांणी सांगलें.
आपल्या मतदारांक खंयचीय सरकारी येवजण आनी महिला सशक्तीकरणाचो लाव घेवपाक आपलें कार्यालय सदांच मजत करतलें अशें आस्वासन आलेमांव हांणी दिलें.
मतदारसंघाची सर्वांगी उदरगत जावची हे खातीर पावलां उबारल्यांत. आमचे कडेन जायतीं उदरगतीचीं प्रस्तावीत कामां आसात. सगल्यांक विस्वासांत घेवनच हे सगले प्रकल्प चालीक लायतले, अशें तांणी सांगलें.
सुटके झुजारी उद्याना सयत हुतात्मा स्मारकाचें रोखडेंच नुतनीकरण करतले. इतिहासीक म्हत्वाच्या ह्या थळांची राखण करप ही सरकाराची तशेंच आमचीय जापसालदारकी आसतली, अशें आलेमांव हांणी सांगलें.
मतदारांक इंटरनॅटाची सुविधा दिवपा खातीर मतदारसंघांत तीन वायफाय स्पॉट सोदून काडटले. हाका लागून आमच्या विद्यार्थ्यांक आनी हेरांक बरे गतीन इंटरनॅट मेळपाक मजत जातली, अशें युरी आलेमांव हांणी सांगलें.
लोकांक आकर्शीत करपी आनी थळावी अर्थवेवस्था बळिश्ट करपी ‘फूड कोर्ट’ बांदपाची आपली येवजण आसा अशें आलेमांव हांणी सांगलें.
आमच्या मतदारसंघांतलो हो सगल्यांत बरो प्रकल्प आसतलो, ताका लागून बर्योच संदी निर्माण जातल्यो. फुडारांत अशे आनीक प्रकल्पांचें नियोजन करतले, अशें तांणी सांगलें.
ह्या वेळार कुंकळ्ळी नगरपालिकेचे नगराध्यक्ष लँडरी मास्कारेन्हस, मेलिसा आलेमांव, चांदराची सरपंच सोनिया फर्नांडीस, पाड्डेंची सरपंच पावलीना फर्नांडीस, मकाझानचो सरपंच आग्नेलो डिकॉस्टा, बाळ्ळीचो सरपंच गोविंद फळदेसाय आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
