भांगरभूंय | प्रतिनिधी
स्वाभिमानी कुंकळ्ळकार’ थारतलो काँग्रेसीची तकलीफोड
मडगांव: कुंकळ्ळीचे सद्याचे आमदार तशेंच विरोधी पक्ष फुडारी युरी आलेमांव हांणी बापायच्या राजकारणाचो वारसो सांबाळटना विवीध विकासकामां केल्यांत. पूण, कुंकळ्ळकारांच्या मुखेल प्रस्ना कडेन आडनदर जाल्ल्याचें सांगून ‘स्वाभिमानी कुंकळ्ळकार’ ह्या गटान येता ते विधानसभा वेंचणुकेंत उमेदवार उबो करपाचें जाहीर केलां. हे वेंचणुकेंत प्रदुशण, पर्यावरण राखण आनी मेगा प्रकल्प हे सारके विशय प्रचाराच्या केंद्र स्थानार उरपाची शक्यताय आसा.
कुंकळ्ळी मतदारसंघाचे सद्याचे आमदार युरी आलेमांव हे काँग्रेसीचे उमेदवार म्हूण वेंचून आयल्यात. कुंकळ्ळी मतदारसंघांत थळाव्या पांवड्यार बेरोजगारीचो प्रस्न, पर्यावरणाचो सांबाळ, मेगा प्रकल्पांक विरोध, परंपरीक उद्देगांची राखण आनी उद्देगीक वसणुकेंतल्या प्रदुशणाचो जावपी त्रास हे मुखेल मुद्दे आसात. विरोधी पक्ष फुडारी ह्या नात्यान युरी आलेमांव हांणी गोंय सरकाराच्या धोरणां सयत, उदकाचो प्रस्न, आयडीसीतलो प्रदुशणाचो प्रस्न, भलायकी सुविधांचो उणाव, म्हारगाय ह्या सारक्या मुद्यांचेर विधीमंडळांत आक्रमक भुमिका घेतल्या. मतदारसंघांत तांणी थळाव्या पांवड्यार लोकांच्यो समस्या सोडोवप आनी लोकसंपर्क वाडोवपाचेर भर दिला.
कुंकळ्ळी हो साश्ट म्हालांतलो राजकी नदरेन जागृत आनी इतिहासीक म्हत्व आशिल्लो मतदारसंघ आसा. हो मतदारसंघ काँग्रेस पक्षाचो बालेकिल्लो मानतात. 1977 सावन आंकडेवारीचेर नदर मारीत जाल्यार हांगा काँग्रेस वा युगोडेपा सारक्या प्रादेशीक पक्षांचें वर्चस्व उरलां. हांगाचे मतदार हे मुखेलपणान खणपट्टी, कृशी, उद्देगीक वसणुकेच्या वाठारा कडेन जोडिल्ले आसात. भाजपाक ह्या मतदारसंघांत पांय रोवपा खातीर सदांच कश्ट घेवचे पडल्यात. आमदार युरी आलेमांव हांचे बापूय ज्योकीं आलेमांव हांणी 2002 आनी 2007 ह्या वर्सा मतदारसंघाचें प्रतिनिधित्व केल्लें.
2017 चे विधानसभा वेंचणुकेंत काँग्रेसीचे तिकेटीचेर क्लाफासियो डायस हांणी 6,415 मतां घेवन फक्त 33 मतांनी जैत नोंद केल्लें. तांणी अपक्ष उमेदवार ज्योकीं आलेमांव हांकां हारयिल्लो. ज्योकीं आलेमांव हांकां 6,382 मतां मेळिल्लीं. भाजपाचे उमेदवार राजन नायक हांणी 5,047 मतां मेळयिल्लीं. गोंय विकास पार्टीच्या जॉन मोन्तेरो हांकां 488, जाल्यार शिवसेनेचे देवेंद्र देसाय हांकां 313 मतां मेळिल्लीं.
2017 वर्सा काँग्रेसीतल्यान वेंचून आयिल्ले क्लाफासियो डायस उपरांतच्या राजकी घडामोडींत भाजपांत गेले. ताका लागून 2022 वर्सा कुंकळ्ळच्या मतदारांनी पक्षांतर करपी आमदाराक न्हयकारून परतून एकदां काँग्रेसीच्या युवा फुडाऱ्याक पसंती दिली. ताका लागून युरी आलेमांव हांणी 9,866 मतां मेळोवन 3,234 मतांच्या व्हड फरकात जैन मेळोवन कुंकळ्ळी मतदारसंघांत काँग्रेसीचो बावटो परतून हुबयलो. भाजपाचे तेन्नाचे आमदार क्लाफासियो डायस हांकां 6,632 मतां मेळिल्लीं. हे वेंचणुकेंत रिव्हॉल्युशनरी गोवन्साचे उमेदवार विल्सन कार्दोज हांकां 2,340, तृणमूल काँग्रेसीचे जॉर्सन फर्नांडीस हांकां 1,282 जाल्यार आपाचे प्रशांत नायक हांकां 906 मतां मेळिल्लीं.
येता ते विधानसभा वेंचणुकेचे फाटभुंयेर राजकी हालचालींक नेट आयलां आनी आमदार युरी आलेमांव हांच्या विरोधांत विरोधक एकठांय आयल्यांत. येता ते वेंचणुकेंत काँग्रेसी कडल्यान युरी आलेमांव हांकां उमेदवारी मेळटली हें निश्चीत आसा. भाजप परतून एकदां ह्या मतदारसंघांत जैत मेळोवपा खातीर यत्न करीत आसा. फाटले वेंचणुकेंत हारिल्ले क्लाफासियो डायस वा पक्षांतल्या हेर थळाव्या फुडाऱ्याचें नांव उमेदवारीचे सर्तींत आसा. क्लाफासियो डायस हांणी मतदार तशेंच पक्षांतल्या कार्यकर्त्यांच्यो गांठीभेटी घेवपाचेर भर दिला. सुदेश भिसेय उमेदवारी मागूंक शकता. आपा कडल्यान प्रशांत नायक हांचे कडल्यान दावो सांगू येता. एल्वीस गोम्स हांणी आपाक सोडचीट दिवन काँग्रेसींत प्रवेश केलाे. पूण ‘स्वाभिमानी कुंकळ्ळकार’ म्हणून जो विरोधकांचो गट तयार जाला तातूंत एल्वीस गोम्स हे लेगीत आसात. ह्या नव्या गटांत सॅमी तावारीस, जॉर्सन फर्नांडीस आनी हेर फुडारी आसात. रिव्हॉल्युशनरी गोवन्स पक्ष लेगीत परतून नशीब आजमावपाचे तयारींत आसा.
कुंकळ्ळी मतदारसंघांतली सद्याची स्थिती पळयत जाल्यार युरी आलेमांव हांंणी विरोधी पक्ष फुडारी पद सांबाळिल्ल्यान मतदारसघांत तांचें राजकी वजन वाडलां. पूण सत्ता बदल आनी तिसऱ्या आघाडीच्या वाडट्या प्रभावाक लागून येता ती वेंचणूक एकतर्फी जायनासतना अटीतटीची जावपाची शक्यताय आसा. मतदारांचो कल हो सदांच थळावीं विकासाकामां आनी पक्षाची निश्ठा हाचेरच चड निंबून उरला.
हांव रिंगणांत नासतलों: प्रशांत नायक
2027 ची विधानसभा वेंचणूक हांव लडोवचो ना. पूण कुंकळ्ळे आम आदमी पक्षाचो उमेदवार रिंगणांत आसतलो हें निश्चीत आशिल्ल्याचें आपाचे संघटण सचीव प्रशांत नायक हांणी सांगलें. सद्या कुंकळ्ळीचें राजकारण पळयत जाल्यार हें काँग्रेस आड काँग्रेस अशें दिसता. कुंकळ्ळेतले बसकेंत चर्चा जाल्ले प्रमाण आपाचे आदले निमंत्रक एल्वीस गोम्स हे उमेदवार आसतले हें स्पश्ट जालां. पूण गोम्स खंयच्या चिन्नाचेर वेंचणूक लडयतले हें अजून स्पश्ट जाल्लें ना. गोम्स हे खंयच्या पक्षा कडल्यान वेंचणूक लडयतले हें तांणी पयलीं जाहीर करचें. तेप्रमाण फुडली रणनिती आंखतले. आम आदमी पक्षान दोन नांवां केंद्रीय वेंचणूक समिती कडेन धाडून दिल्यात. योग्य निर्णय योग्य वेळार आप घेतलो अशें प्रशांत नायक हांणी स्पश्ट केलें.
काँग्रेस- भाजप हांचे मदीं अटीतटीची लडत
कुंकळ्ळी विधानसभा मतदारसंघ हो दक्षीण गोंय जिल्ह्यांतलो म्हत्वाचो मतदारसंघ आसून दक्षीण गोंय लोकसभा मतदारसंघा खाला येता. 2022चे मतदार वळेरे प्रमाण हांगा सुमार 29,432 मतदार आसून तातूंत सुमार 14,300 दादले आनी 15,100 बायलो मतदार आसात. बायलांच्या मतदारांची संख्या दादल्यां परस मात्शी चड आसा. युरी आलेमांव (काँग्रेस) हे सद्याचे आमदार आसात. ह्या मतदारसंघांतल्यान फेरदीन रिबेलो (जनता पक्ष), मान्युएल ग्रेगोरियो फर्नांडीस (काँग्रेस), अरेसियो डिसोझा (यूजीडीपी), ज्योकीं आलेमांव (काँग्रेस), सुभाष ऊर्फ राजन नायक (भाजप), क्लाफासियो डायस (काँग्रेस) हांणी प्रतिनिधित्व केलां. कुंकळ्ळी मतदारसंघाचेर काँग्रेसीचो परंपरीक प्रभाव उरिल्लो आसलो तरी मतदार वेळावेळार बदलाकूय संद दीत आशिल्ल्यान हांगा काँग्रेस- भाजप हांचे मदीं अटीतटीची लडत जायत आसता.
————-
बॉक्स
2022त उमेदवारांनी मेळयिल्लीं मतां
युरी आलेमांव (काँग्रेस) 9,866
क्लाफासियो डायस (भाजप) 6,632
विल्सन कार्दोज (आरजीपी) 2,430
जॉर्सन फर्नांडीस (तृणमूल काँग्रेस) 1,282
प्रशांत नायक (आप) 906
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
