युपी वॉरियर्स प्ले ऑफांत

भांगरभूंय | प्रतिनिधी

बायलांचे प्रिमियर लिगेची (डब्ल्यूपीएल) 17वी मॅच युपी वॉरियर्स आनी गुजरात जायण्ट्स ह्या पंगडां मदीं जाली. अखेर मेरेन रंगिल्ले मॅचींत युपी वॉरियर्सान गुजरात जायण्ट्साक तीन विकेटींनी हारयलो. ह्या जैता सयत युपी वॉरियर्सान प्ले ऑफांतली आपली सुवात निश्चीत केली. मुंबय इंडियन्स आनी दिल्ली कॅपिटल्स ह्या पंगडांनी आदींच प्ले ऑफांतली आपली सुवात निश्चीत केल्या.

युपी वॉरियर्साच्या ह्या जैतान गुजरात जायण्ट्स सयत रॉयल चॅलेंजर्स बंगळुरूचें डब्ल्यूपीएलांतलें आव्हान सोंपलें. युपी वॉरियर्साचे सात मॅचींतल्यान आठ गूण जाल्यात. तशेंच गुजरात जायण्टासाचे आठ मॅचींतल्यान स गूण आसात. रॉयल चॅलेंजर्स बंगळुरूचे सध्या सात मॅचींतल्यान चार गूण आसात. अखेरची मॅच जिखली जाल्यारूय ताचे चडांतचड स गूण जातले आनी ताका युपी वॉरियर्साच्या गुणां कडेन बरोबरी करपाक जमची ना.

मजगतीं, ब्रेबॉर्न स्टेडियमाचेर टॉस जिखून पयलीं बॅटींग करपाचो निर्णय घेवपी गुजरात जायण्ट्सान निर्धारीत 20 ओव्हरींनी 6 विकेटी वगडावन 178 धांवड्यो केल्यो. दयालन हेमलतान 33 बॉलांनी 57 धांवड्यो केल्यो जाल्यार अॅश्ले गार्डनरान 39 बॉलांनी 60 धांवड्यो केल्यो.

179 धांवड्यांचो फाटलाव करतना युपी वॉरियर्साक पयलो धपको दुसरेच ओव्हरींत बसलो. मुखेली अॅलिसा हिली फकत 12 धांवड्यो करून बाद जाली. दुसरी विकेट किरण नवगिरेच्या रुपान पडली. तिका फकत चार धांवड्यो करप शक्य जाल्यो. तिसरी विकेट देविका वैद्याच्या रुपान पडली. तिणें सात धांवड्यो केल्यो. युपी वॉरियर्साचें पुनरागमन ताहलिया मॅकग्रा आनी ग्रेस हॅरिस हांच्या मार्गदर्शनाखाला जालें.

दोगांयनी 53 बॉलांनी 78 धांवड्यांची भागिदारी करून पंगडाचो स्कोर 100 वयर पावयलो.

ताहलिया मॅकग्रान 34 बॉलांनी आपलो अर्द शेंकडो पुर्ण केलो. हातूंत 10 चवक्यांचो आस्पाव आशिल्लो. अखेरेक 38 बॉलांनी 57 धांवड्यो करून मॅकग्रा बाद जाली. तिका अॅश्ले गार्डनरान बाद केली. पंगडाक पांचवो धपको दिप्ती शर्माच्या रुपान बसलो. तिका फकत स धांवड्यो करप शक्य जाल्यो. ग्रेस हॅरिसान 72 धांवड्यांची आक्रमक बॅटींग केली.

उरिल्लें काम सोफी एक्लेस्टनान (19) केलें. गुजराता वतीन किम गार्थान दोन विकेटी घेतल्यो.