भांगरभूंय | प्रतिनिधी
नवी दिल्ली, खबरां संस्था ः केंद्रीय लोकसेवा आयोगाचे (युपीएससी) निकाल जाहीर जाल्यात आनी देशांत आदित्य श्रीवास्तव पयलो जाल्यार अनिमेश प्रधान दुसरो आयलो. फाटलीं दोन वर्सां चलयांनी पयले तीन क्रमांक मेळयिल्ले. अंदूं मात चले मुखार आसात. देशांत तिसऱ्या क्रमांकाचेर डोनुरू अनन्या रेड्डी आसा. केंद्रीय लोकसेवा आयोगान 2023 वर्सा घेतिल्ल्या परिक्षांचे हे निकाल आसून ताचे सविस्तर निकाल upsconline.nic.in आनी upsc.gov.in ह्या संकेतथळार पळोवंपाक मेळटा.
1016 उमेदवार UPSC पास
अंदूं 1016 उमेदवार युपीएससी परिक्षेंत पास जाल्यात. हातूंत 347 उमेदवार उक्त्या प्रवर्गांतले, 116 उमेदवार अर्थीक नदरेन मागास प्रवर्गाचे, 303 उमेदवार ओबीसी प्रवर्गांतले, 165 उमेदवार अनुसुचीत जाती प्रवर्गांतले आनी 86 उमेदवार अनुसुचीत जमाती प्रवर्गांतले आसात. फाटल्या वर्सा हेंच प्रमाण उक्ते वर्ग– 345, अर्थीक नदरेन मागास वर्ग– 28, ओबीसी– 52, अनुसुचीत जाती– 5 आनी अनुसुचीत जमाती– 4 अशें आशिल्लें. हातूंतले 200 जाण आयपीएस तर 180 जाण आयएएस जातले.
यूपीएससीचो निकाल कसो पळोवचो?
upsc.gov.in ह्या संकेतथळार UPSC CSE Results लिंकाचेर क्लिक करात. उपरांत तुमचो लॉगीन तपशील भरात. तुमचो निकाल स्क्रीनीचेर दिसतलो. रिजल्ट शीट डावनलोड करपाचो पर्यायय हांगा दिला.
2021 आनी 2022 वर्सा चलयांनी मेळयल्लो पयलो क्रमांक
2021 वर्साचे परिक्षेंत श्रुती शर्मा हांणी देशांतल्या यूपीएससी परिक्षेंत पयलो क्रमांक मेळयलो जाल्यार अंकिता अग्रवाल आनी जेमिनी सिंगला हांणी अनुक्रमान दुसरो आनी तिसरो क्रमांक मेळयलो. उपरांत 2022 वर्सा जाल्ल्या परिक्षेंत देशांत इशिता किशोर हांणी पयलो, दुसरो क्रमांक गरिमा लोहिया जाल्यार देशांतलो तिसरो क्रमांक उमा हराथीनं आनी देशांतलो चवथो क्रमांक स्मृति मिश्राक मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
