भांगरभूंय | प्रतिनिधी
पक्षाचे प्रभारी माणिकराव ठाकरे हांचें सांगणें
पणजी: येता ते वेंचणुकेंत गोवा फॉरवर्ड पक्षा कडेन युती वा विलिनीकरणाच्या प्रस्तावाचेर काँग्रेस पक्ष गोवा फॉरवर्डाचे अध्यक्ष विजय सरदेसाय हांचे कडेन चर्चा करतलो. प्रदेश काँग्रेसीतल्या कांय पदाधिकाऱ्यां कडेन चर्चा करपाची जापसालदारकी दितले, अशें पक्षाचे प्रभारी माणिकराव ठाकरे हांणी सांगलें
प्रदेश काँग्रेसीची सोमारा काँग्रेस हावजांत बसका जाली. हे बसके वेळार प्रभारी माणिकराव ठाकरे उलयताले. गोवा फॉरवर्डाचे अध्यक्ष विजय सरदेसाय हे खडेगांठ फुडारी आसात. काँग्रेस आनी गोवा फॉरवर्ड पक्षा मदीं सध्या युती आसा. येता ते वेंचणुकेंत खंयच्या पक्षा कडेन युती करप हे विशीं अजून निर्णय जावपाचो आसा. योग्य वेळार चर्चा जावन निर्णय जातलो. गोवा फॉरवर्डाचे अध्यक्ष विजय सरदेसाय हांचे कडेन चर्चा जातली. युती विशीं तांचे किदें म्हणणे आसा, ते पक्ष आयकून घेतलो. गोवा फॉरवर्ड पक्ष काँग्रेसींत विलीन करपाचो तांचो प्रस्ताव आसा जाल्यार ताचेर विचार जातलो. तांचे कडेन चर्चा करून पक्ष निर्णय घेतलो, अशें माणिकराव ठाकरे हांणी सांगलें.
सरकार काँग्रेसीचें घडोवपा
कडेन लक्ष: युरी आलेमांव
हाचे पयलीं 2017 वर्सा भाजपा कडेन कोणे युती केली, 2022चे वेंचणुके उपरांत किदें जालें, हाचेर म्हजें लक्ष ना. भाजपाक हाराेवपा खातीर विरोधकांनी एकठांय रावपाची गरज आसा. 2027 वर्सा काँग्रेसीचें सरकार घडोवपा कडेन आमचे सगल्यांचें लक्ष आसा, अशें युरी आलेमांव हांणी विजय सरदसाया विशीं उलयतना सांगलें.
मनिशा उजगांवकार, शमिला सिद्दिगी निलंबीत
पक्ष विरोधी कारवायां खातीर मनिशा उजगांवकार आनी समाज माध्यम संघटक शमिला सिद्दिगी हांकां पक्षान निलंबीत केल्यात. पक्षाचे बसकेंत चर्चा जावन हो निर्णय घेतलो, अशी म्हायती अमरनाथ पणजीकार हांणी दिली. बसकेंत पक्षाची शिस्त आनी पक्षा आड वावर करतल्यांचेर कारवाय करपा विशीं चर्चा जाली. दोगांची चवकशी सुरू आसा. आपली बाजू मांडपाची संद पक्षान तांकां दिल्या, अशें अमरनाथ पणजीकार हांणी सांगलें.
बसकेक अमीत पाटकार गैरहाजीर
पक्षाचे आदले अध्यक्ष अमीत पाटकार हे गैरहाजीर आशिल्ले. बसके विशीं आपणाक कसलीच कल्पना ना, अशें तांणी सांगलें.
अमीत पाटकार हे काँग्रेसीचे एकनिश्ठ वावुरपी आसा. गोंय तशेंच पक्षा खातीर ते सेगीत वावर करीत रावतले, अशें प्रभारी माणिकराव ठाकरे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
