भांगरभूंय | प्रतिनिधी
पर्वरी, प्रतिनिधी : पंचायतींचे सचीव आनी गटविकास अधिकारी (बीडीओ) हांचे मदीं युती जाल्ल्यान चडश्या वाठारांनी बेकायदेशी बांदकामां वाडतूच चल्ल्यांत. हें आडावपा खातीर कारवाय जाल्यार आमदारांनी तांकां वाटावपाक म्हजे कडेन येवचें न्हय. ताका लागून पंचायत प्रशासनाच्या कामाचेर खर परिणाम जाता. अशे सचीव आनी बीडीओंक निलंबीत करपाचो विचार आसा, अशें पंचायत मंत्री मावीन गुदिन्हो हांणी आयज सभाघरांत स्पश्ट केलें.
विधानसभेच्या अर्थसंकल्पीय अधिवेशनांत आयज सकाळीं प्रस्न काळांत आमदार आलेक्स रेजिनाल्ड लॉरेन्स हांणी प्रस्न हाजीर केलो. ह्या प्रस्नाक जाप दितना मंत्री गुदिन्हो उलयताले.
पंचायत वाठारांत जर बेकायदेशीर बांदकाम जाता अशें कळ्ळ्यार ‘पंचायत राज’ कायद्या प्रमाण नेम ६६३ आनी ६६४ खाला एका म्हयन्यांत स्वता पंचायत तांचेर करपाक शकता. खंयचेंय बांदकाम जाल्ल्याचें कळ्ळ्यार ताचो रोखडोच अहवाल स्वता पंचायत बीडीओक धाडपाक शकता. कायद्यान तितले अधिकार तांकां दिल्यात. मात आयज मेरेनच्या इतिहासांत गोंयच्या एका तरी सचिवान अशी स्वता दखल घेवन बांधकामाचेर कारवाय केल्ल्याचें आयकलां? असो उपरोधीक प्रस्न मंत्री गुदिन्हो हांणी सभाघरांत विचारलो.
सचिवांनी बरें काम करचें, कायदे पाळचे ही जापसालदारकी बीडीओंची आसता. खंयचोय सचीव बेकायदेशीर कामांत गुंथिल्ल्याचें दिसल्यार बीडीओन ताचेर रोखडीच कारवाय करपाची अपेक्षा आसा. मात गोंयांत अशेंय केन्नाच घडना. अचीव आनी बिडिओ हांचे मदीं युती जाल्या. ते सरपंचांकूय आयकना. अश्या सचिवांचेर कारवाय केल्यार रोखडेच कांय आमदार, लोकप्रतिनिधी म्हजे कडेन तांकां वाटावपा खातीर येतात. हाका लागून पंचायत प्रशासनाचो कारभार इबाडला. हो कारभार सुरळीत करपाचो आसल्यार सचिवांचेर खर कारवाय करप गरजेचें. तांचेर कारवाय केल्यार कोणेंच म्हजे कडेन तांकां वाटावपा खातीर येवचें न्हय अशें मंत्री गुदिन्हो हांणी सभाघरांत म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
