भांगरभूंय | प्रतिनिधी
संयुक्त अरब अमीरात आनी भारताचे इश्टागतीक खंय अंदूं पन्नास वर्सां पूर्ण जालीं. तशे पळोवशात जाल्यार ह्या देसाक 2021 सालांतच पन्नास वर्सां पूर्ण जाल्यांत. हाचोच अर्थ देश तयार जालो आनी वर्सा भितरच भारतीयांनी इश्टागतीचो हात मुखार केलो.
अशे म्हणटात की ह्या देशाचे लोकसंख्येंत जवळ जवळ चाळीस टक्के भारतीयांचो समावेश आसा. ह्या देशाचे उदरगतींत भारतीयांचो मोलाचो वांटो आसा आनी तांकां ताची पुराय जाणिवूय आसा. फाटलीं सतरा वर्सां हांव ह्या देशाचे राजधानी अबुधाबींत रावतां. हांगा रावतल्या भारतीय लोकांनी समाधानी जावन दीस काडचे हाची पुराय काळजी ह्या देशांत घेतिल्ली दिसून येता. भारताच्या विंगड विंगड राज्यांत मेळपी सामान आनी खाण, तशेच आमचे तरेचें जेवण आनी आमची भास आनी भारतीय भुरग्यां खातीर भारतीय शाळा… भारतीयां खातीर कितेंच ना म्हणून ना हांगा.
चवथ, दिवाळी, तशेच बाकीचे सण तर हांगा लोक मनयतातच पूण हांगा, ह्या इस्लामीक देशात जे तरेचीं देवळां आनी इगर्जी आसात तीं तोखेवपा सारखीं. हालींच दुबयंत एक नवें देवूळ बांदलां आनी ह्या देवळांत वेगवेगळ्या देवाच्यो मुर्ती दवरल्यात. पुजा करतात, आरती म्हणटात, प्रसाद लायतात, सांगणी करतात आनी येतल्या सगळ्यांक प्रसादय दितात. ह्या देशांत हें अणभवपाक मेळटा हेंच व्हडलें.
अबुधाबींत अशेंच एक देवळाचें बांदकाम चालू आसा. हें देवूळ बांदूंक दिवपाक हांगाच्या शेखांनी खंय तेरा एकर जमीन दान केल्या तशेंच आनीक तेरा एकर जमीन पार्किंगाची वेवस्था करचे खातीर दिल्या. ‘सगळ्यांक हें कळूंक जाय की येदें व्हडलें देवूळ आमचे अबुधाबींत आसा’ शेखाचें अशें म्हणणें. ह्या देवळाच्या बुनयादीची वीट हांगाच्या शेखांनी दवरल्या जाल्यार एक वीट भारताचे प्रधानमंत्री नरेंद्र मोदीन. इतलेच न्ही तर दर आयताराक बांदकाम चालू आसा थंय वचत जाल्यार थंय वतल्या दर एकल्याक आपल्या हातान बांदकामांतली एक वीट दवरूंक मेळटा.
15 आगस्टाक आनी 26 जानेवारीक जेन्ना बुर्ज खलिफाचेर तशेच आनिकूय जाग्यांनी भारतीय तिरंग्याच्या रंगाची लायटींग करतात तेन्ना तें पळोवन काळीज भरून येता. भारताक दिल्लो मान पळयता तेन्ना अभिमानान एक भारतीय म्हणून बोमाडो फुलोवचो तशी छाती फुलता. ह्या देशाच्या आनी आमच्या देशाच्या नात्याक ह्या वर्सा पन्नास वर्सां पूर्ण जालीं. तांच्या हाताक तेलाची खाण लागली आनी आमच्या गरजवंताक आनी बुदवंतांक एक दिका मेळ्ळी. शेख झायद हो तेन्नाचो एक विचारवंत राज्यकरतो. अशें म्हणटात, हो देश ताचे दूरदृश्टी खातीर घडूंक पावलो. ताणें ह्या देशाचो फुडार घडयलो. सात अमीरात म्हणजेच सात राज्यां एकठांय करून घडोवन हाडलो हो देश जाका फुडें नांव पडलें… संयुक्त अरब अमीरात. एका वाळवंटांत उबो केल्लो हो देश म्हळ्यार एक अप्रूपच! हो देश आज जगांतलो सगळ्यांत सुंदर पर्यटक आकर्शणाचो जागो. विंगड विंगड देशांतले लोक हांगा भोंवपाक येतात. आनी खोशी जावन परततात. खर्च जालो तरी पयशे वाशील!
भारतीयां खातीर हो देश म्हणल्यार सगळ्यांत लागींचो परदेस. नोकरेक, खरेदीक तशेंच भोंवपा खातीर कोणाकूय आवडपा सरकोच हो जागो. आपल्या देशांत रावतल्या सगळ्यांनी आनी येतल्या सगळ्यांनी खुशालभरीत आनी धादोशी आसचें अशेंच हांगाच्या शेखाचें चिंतप. ह्या वर्सा तर पन्नास वर्सांची इश्टागत हांगा वेगवेगळे तरेन मनयतात. हो देश आज जंय पावला तो थंय पावोवपांत भारतीयांचो मोलाचो वांटो ते विसरनात.
रुपाली मावजो किर्तनी
00971506890867
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
