यद् भावं तद् भवति : मना शक्त ही जिविताचो आधार

भांगरभूंय | प्रतिनिधी

सपन पळयले मात्राक तें खरें जायनात. सपनाचे वांगडा कश्ट, धैर्य, सतत प्रयत्न आनी योग्य निर्णय आसल्यार यश मेळटा.

यद् भावं तद् भवति – हे आमगेल भारतीय ज्ञान परंपरेचे एक अमूल्य विचार. ताचो अर्थ आसा– आमी जशें भाव आनी विचार मनांत दवरतात, तशेंच आमगेले जिवीत रूप घेता. मनाचे विचार फक्त कल्पना न्हय, तांतूं आमगेल व्यक्तित्व, वर्तन आनी भविश्य घडोवपाची शक्ती आसा. काळ बदलाव जावचाक पुरो जाल्यार आमी वापरचे शब्द नवे- नवे रूपांतू आमगेल मुखार येतात. पोरणे विचार नवे रूपांतर जावनू येवचे नवो विचार न्हय, आमी पोरणे वैन नवे बाटली म्हणचे उतर समाजांतू जाता आसचे बदलावाक निदर्शन दिता.
आयचे युवा पिळगेंत ‘म्यानिफेसटेशन’, “पाॅसिटीव थिंकिंग’,‘लाॅ आॅफ एट्रेक्शन’ ह्या विचारांचो उल्लेख खूब जाता आसचे आमी पळोवेत, आज प्रमुख जावनू सोशियल मीडियांतू 11.11 (इकरा वरां – इकरा मिनीट) तशे साबार रिल्सांतू युनिवर्स तुमकां आयकता, तुमगेले मनांतू आशील्ल बरोवनू दवरात, त्या वेळेंतू जीवनांतूल बदलावाचे चिंतन करचे असले विचार येवचे आमी पळोवनू आसंची. पूण ह्या नव्या नांवां फाटल्यान आसचें मूलतत्व आमगेल भारतीय संस्कृतींत पूर्वील काळा दाकून ‘यद् भावं तद् भवति’ म्हणून सांगलां.
म्यानिफेसटेशन म्हणल्यार आमगेल ध्येय स्पश्ट करून, ताचेर विस्वास दवरून, ताच्या खातीर यत्न करप. फक्त ‘हांव यशस्वी जातलों’ म्हण विचार केल्यार यश मेळचें ना. त्या विचारांक कश्ट, शिस्त आनी सतत प्रयत्नाची जोड आसचाक जाय. असले एक मार्ग प्रार्थन – आजीकय सक्कड मत धर्मांतू प्रार्थनेक प्रमूख स्थान दिलेल आसा. तांतू सामूहीक प्रार्थन – सक्कड लोक सांगात येवनू एक विचाराक लागून सतत मनन केल्यार जगत त्या आयकता म्हळेल पात्येणी आसा. त्या नंता सनातन धर्मांतू ‘संकल्प करचे आनी मनोभिशठ जवो मनोकामन देवा लागीं दवरून पूजा करचेय ह्या ‘म्यानिफेसटेशना’चें एक रूप म्हणेत.
एक विद्यार्थी ‘म्हाका साध्य ना’ म्हूण विचार केल्यार ताचें सामर्थ्य आसून लेगीत भिरांत ताका फाटीं दवरता. पूण ‘हांव प्रयत्न करतलो, हांव शिकपाक शकता’ ह्या सकारात्मक भावान ताच्या मनांत आत्मविश्वास निर्माण करता.
म्यानिफेसटेशन‌ंत कृतज्ञता (Gratitude), मनांत चित्र रचप (Visualization), आनी सकारात्मक वाक्यां (Affirmations) ह्या विधानांचो उपेग करतात. ध्येय निरंतर याद करप, मेळेल अवकाशां खातीर कृतज्ञ रावप आनी आपणाले सामर्थ्याचेर विस्वास दवरप – ह्या सगळ्यान जिवितांत बदलाव हाडूं साध्य आसा.
पूण म्यानिफेसटेशन म्हणल्यार एक जादू न्हय. सपन पळयले मात्राक तें खरें जायनात. सपनाचे वांगडा कश्ट, धैर्य, सतत प्रयत्न आनी योग्य निर्णय आसल्यार यश मेळटा. बी रोवन उदक घाल्चें ना आनी झाडाची आशा करप साध्य ना; तशेंच प्रयत्न नातल्यारी ते कार्यरूपाक येवचे नात.
आयच्या स्पर्धात्मक संवसारांत जायते युवक चिंता, तुलना आनी नकारात्मक विचारांनी त्रास घेतात. त्या वेळार ‘यद् भावं तद् भवति’ हो संदेश आमकां आमगेल विचार बरे दिशेन व्हरपाक शिकयता. त्या दाकून धनात्मक चिंतन आनी त्या नदरेन सपन पळोवनू सतत प्रयत्न केल्यार निजावनूय जगताचे सर्वशक्ती सांगात येवनू तें कार्य साकार जावचे कडेन साथ दिता.
बरें विचार करका, बरें विश्वास दवरका आनी बरें करपाक प्रयत्न करका. कारण आमी जे भाव मनांत पोसताकी, फाल्याचें आमगेल जिवीत त्याच भावाचें प्रतिबिंब जाता.
(लेखक मंगळुरी कोंकणी शैलींत आसा.)

डाॅ. वेंकटेश नायक, मंगळूरू
9738278067