भांगरभूंय | प्रतिनिधी
पणजीः गोंय शालांत मंडळान घेतिल्ले बारावेचे परिक्षेचो निकाल जाहीर जाल्ल्यान विद्यार्थ्यांची आतां म्हाविद्यालयीन प्रवेशाची तयारी सुरू जाल्या. कला, वाणिज्य आनी विज्ञान फांट्याच्या पयल्या वर्साच्या प्रवेशाची प्रक्रिया 10 मे सावन सुरू जातली, अशी म्हायती उच्च शिक्षण संचालनालयाचे संचालक भुशण सावयकार हांणी दिली.
म्हाविद्यालयीन पांवड्यार नव्या राष्ट्रीय शिक्षण धोरणाची कार्यवाय सुरू जाल्या. ते खातीर अंदूं म्हाविद्यालयीन प्रवेशाची सुरवात उसरां जाल्या. फाटल्या वर्सा प्रमाण अंदूंय सगळ्या म्हाविद्यालयांनी एकवटान (सेंट्रलायज्ड) प्रवेश प्रक्रिया सुरू जातली. अर्ज घेतले उपरांत गुणवत्ता वळेरी जाहीर जातली. ते प्रमाण प्रवेश दितले, अशें संचालकांनी सांगलें.
पोरूं परस अंदूं निकालाचें प्रमाण उणें आसा. हाका लागून म्हाविद्यालयांनी जागे वाडोवपाची गरज पडची ना. वैजकी, अभियांत्रिकी ह्या वेवसायीक म्हाविद्यालयाचो प्रवेश नीट, जेईई ह्या प्रवेश परिक्षेच्या गुणांचेर जातलो. वेवसायीक म्हाविद्यालयाची प्रवेश प्रक्रिया तंत्रीक शिक्षण संचालनालया वतीन जातली, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
