म्हायती तंत्रज्ञान मळा वेली नवी उडकी आवाक्यात !

भांगरभूंय | प्रतिनिधी

भारतीय म्हायती तंत्रज्ञान उद्देगाचो प्रवास हो फाटल्या चार दसकांतल्या भारताच्या सगल्यांत मोट्या अर्थीक आनी बौद्धीक परिवर्तना पैकीं एक मानतात. एका काळार कृशीप्रधान आनी परकी तंत्रज्ञानाचेर निंबून आशिल्लो देश आयज जगांत डिजिटल आनी म्हायती-तंत्रज्ञान मळा वेलो म्हत्वाचो भागिदार जाला. ह्या परिर्वतना फाटल्यान तंत्रीक कुशळटाय न्हय, जाल्यार दूरदृश्टी, नेतृत्व, संवसारीक विचारसरणी आनी सातत्यपूर्ण प्रयत्न हांचो मोटो वांटो आसा. म्हायती तंत्रज्ञान मळा वेल्या दिग्गजांनी एकवटान कार्यरत रावन हें परिवर्तन घडोवन हाडलां अशें म्हणूंक येतलें. कित्याक खबर ना ह्याच एकवटाचें प्रतिबिंब पयर मुंबयंत गोंयचे पूत आनी आमचे शाळे सावनचे इश्ट आशांक देसाय हांच्या अमृतमहोत्सवी वाडदीस सुवाळ्यांत पळोवंक मेळ्ळें. आशांक देसाय हांची वळख आयज भारतीय आयटी उद्देगाचो पांचवो स्तंभ म्हूण करतात. तांच्या 75व्या वाडदिसा निमतान भारतीय आयटी विश्वातल्या चडश्या सगल्याच दिग्गज मानेस्तांनी लायिल्ली हाजेरी ही तांच्या योगदानाची घेतिल्ली समाजीक आनी वेवसायीक दखलच अशें म्हणूंक येतलें. भारतीय आयटी उद्देगाक संवसारीक विस्वासार्हतेचो चेरो जांणी दिला ते एन. आर. नारायण मुर्थी हांची ह्या सुवाळ्यांतली हाजेरी खूब कितें सांगून गेली. तांचे सयत अशीं खूबशा जाणांची नांवां घेवंक येतलीं की जांणी भारतीय आयटी उद्देगाक आयचो दर्जो मेळोवन दिवपाक भरीव योगदान दिलां ते ह्या सुवाळ्याक हाजीर आशिल्ले. हातूंत पद्मश्री प्रो. दीपक बी फाटक, प्रो. देवांग खाखर, एनआयआयटीचे अध्यक्ष आनी जोड संस्थापक राजेंद्रसिंह पवार, आयटी उद्देजक आनी नासकॉमचे जोड संस्थापक हरीष मेहता, प्रो. एस. पी. सुखात्मे, अनुराग बात्रा अशे खूबशे जाण आशिल्ले की आयटी उद्देगान देशांत जी आयज व्हड उडकी घेतल्या ती तांच्या योगदाना बगर अशक्यूच आशिल्ली.
आशांक देसाय हांचो अमृतमहोत्सवी वाडदीस सुवाळो हो वाडदीस कमी आनी म्हायती तंत्रज्ञान मळा वेल्या दिग्गजांचो एक मेळावोच आमच्या सारक्यांक दिसलो. खरें पळयत जाल्यार ह्याच एकवटान म्हायती तंत्रज्ञान मळा वेले दिग्गज भारतीय आयटी उद्देगाक चडांत चड उंचायेर व्हरपा खातीर वावरत आसात हाचो साक्षात्कार जालो. आशांक देसाय हांणी तर स्पश्ट उतरांनी आमी सगले ‘साथ साथ’ आसात हाची गवाय दिवन भारतीय आयटी उद्देगाक बरो फुडार आशिल्ल्याचें सुचीत केलें. भारतान फाटल्या तीन साडेतीन दसकांत म्हायती तंत्रज्ञान मळार घेतिल्ली उडकी ही देशाच्या अर्थीक इतिहासांतली सगल्यांत व्हड परिवर्तना पैकीं एक मानतात. एका काळार फक्त सवाय मनीसबळ पुरोवप देश म्हूण वखळ आशिल्लो भारत आयज सॉफ्टवेर विकास, डिजिटल सेवा, क्लावड तंत्रज्ञान, कृत्रीम बुद्धिमत्ता, सायबर सुरक्षा, फिनटेक आनी स्टार्टअप परिसंस्थेंत म्हत्वाचो संवसारीक खेळगडो जाला हाची दखल घेवचीच पडटली आनी हो प्रवास तसो सोंपो मात नाशिल्लो. एक दोग जाणां कडेन जाल्ले चर्चेंतल्यान आमी आयज नेमके खंय आसात, संवसारीक सर्तींत आमकां अजून कितें करपाचें आसा, अमेरिका- चीनाक कशें गांठूंक येतलें हे विशीं आमच्या ज्ञानांत बरीच भर पडली. भारतीय आयटी उद्देगाची कथा ही फक्त उद्देगाची कथा न्हय, ती आधुनीक भारताच्याग परिवर्तनाची कथा आसा. कांय दूरदृश्टी आशिल्ल्या मनशांनी लायिल्ल्या रोंपाचें आज व्हड रूख जालां. त्या रुखाक अदीक घटाय दिवपाची जापसालदारकी आतां नवे पिळगेचेर आसा. आनी म्हणूनच आशांक देसाय हांचे सारक्या व्यक्तीमत्वांचो भोवमान हो फक्त एका मनशाचो भोवमान नासून भारतीय म्हायती तंत्रज्ञानाच्या समृद्ध प्रवासाक दिल्लो आदर आसा.
भारतीय आयटी उद्देगाचो विकास तीन टप्प्यांनी जालो. पयलो टप्पो आशिल्लो सॉफ्टवेर सेवा निर्यात आनी आवटसोर्सिंग. जगांतल्या व्हड कंपनींनी खर्च उणो करपा खातीर भारता कडेन पळयलें. दुसऱ्या टप्प्यांत भारतान फक्त सेवा पुरोवपी देश म्हूण न्हय जाल्यार तंत्रीक उपाय आनी संशोधन मळा वेले भागिदार म्हूण स्थान निर्माण केलें. तिसरो आनी सद्याचो टप्पो म्हणल्यार कृत्रीम बुद्धिमत्ता, क्लावड तंत्रज्ञान, सायबर सुरक्षा, डेटा विश्लेशण, डिजिटल परिवर्तन आनी आपचलीत प्रणालींचो. आयज भारताचें संवसारीक स्थान सामकें म्हत्वाचें आसा. संवसारांतल्या खूबशा मुखेल कंपनींची तंत्रीक केंद्रां भारतांत आसात. जगभर वापरतल्या डिजिटल सेवा, बँकिंग प्रणाली, ई-कॉमर्स, वैजकी तंत्रज्ञान आनी क्लावड प्रणालींत भारतीय अभियंत्यांचें व्हड योगदान आसा. अमेरिकेंतल्या व्हड तंत्रज्ञान कंपनीं पसून युरोप, मध्यपूर्व आनी आशियाई देशां मेरेन भारतीय तंत्रज्ञांनी आपली तांक सिद्ध केल्या. मजगतीं फुडली वाटचाल आव्हानां बगर ना. कृत्रीम बुद्धिमत्ता आनी आपचलनाक लागून परंपरीक नोकऱ्यांचें स्वरूप बदलत आसा. फक्त कोडिंग फावोशें उरचें ना. सर्जनशील विचार, संशोधन तांक, समस्या सोडोवपाची कुशळटाय आनी अभिनव पद्दतींक चड म्हत्व मेळटलें. भारताक आतां सेवा पुरोवपी देश ह्या प्रतिमेतल्यान भायर पडून ज्ञान निर्माण करपी देश म्हूण उबें रावचें पडटलें. भारताची तरणाटी लोकसंख्या आनी तंत्रीक कुशळटाय हो आमचो सगल्यांत मोटो ठेवो आसा.
संवसारीक सर्तीच्या संदर्भांत पळयत जाल्यार भारताची सगल्यांत व्हडली तांक म्हणल्यार ताचे कडेन आशिल्लें सुमारा भायर मनीसबळ. दरवर्सा लाखांनी अभियंते आनी तंत्रज्ञान मळा वेले विद्यार्थी शिक्षण पुराय करून रोजगार बाजारांत येतात. तशेंच भारतांत स्टार्टअप संस्कृती गतीन वाडल्या. कृत्रीम बुद्धिमत्ता, डिजिटल पेमेंट, ई-कॉमर्स, हेल्थ टेक आनी शिक्षण तंत्रज्ञान मळार भारतीय कंपनीं नवे नवे प्रयोग करीत आसात. मजगतीं, संवसारीक सर्तींत थोडीं आव्हानांय आसात. भारत अजून लेगीत व्हड प्रमाणाचेर सेवा आदारीत अर्थवेवस्थेचेर निंबून आसा. संवसारांतली अत्यंत प्रगत तंत्रज्ञान उत्पादनां, चीप निर्मिती, मुळावें संशोधन आनी संवसारीक पांवड्या वेलें हार्डवेर उत्पादनांत भारताची उपस्थिती तुळेन उणी आसा. अमेरिके सारके देश तंत्रज्ञानांतलें संशोधन आनी नवकल्पनांनी खूब मुखार आसात, जाल्यार चीनान हार्डवेर उत्पादन 5G आनी कृत्रीम बुद्धिमत्तेंत व्हड उडकी घेतल्या. आयज आयटी मळार आघाडीचेर आशिल्ल्या देशांचो विचार करीत जाल्यार सगल्यांत पयलीं अमेरिका येता. भारत नेमको संवसारीक पांवड्यार खंय उबो आसा, हो प्रस्न म्हत्वाचो आसा. सेवा आनी सॉफ्टवेर निर्यात मळार भारत संवसारांतल्या अग्रगण्या देशां मदीं आसा. संवसारीक कंपनींची खूबशीं संशोधन केंद्रां भारतांत आसात. भारतीय अभियंत्यांनी संवसारभरांतल्या खूबशें तंत्रज्ञान कंपनींनी फुडारपणाची भुमिका घेतल्या. पूण संशोधन आनी मुळावें तंत्रज्ञान विकासाचे बाबतींत भारत अजूनय अमेरिका, चीन वा कांय युरोपीय देशां फाटल्यान आशिल्ल्याचें दिसून येता. भारता खातीर आशादायक गजाल म्हणल्यार डिजिटल मुळाव्यो सुविधा. डिजिटल वेव्हार, ऑनलायन सेवा, भौशीक डिजिटल प्लॅटफॉर्म आनी कृत्रीम बुद्धिमत्तेच्या वाडट्या वापराक लागून भारत नव्या तंत्रज्ञान क्रांती खातीर सज्ज जायत आसा. येता त्या दसकांत चीप निर्मिती, कृत्रीम बुद्धिमत्ता, क्वांटम संगणन आनी सायबर सुरक्षेंत भारतान चड गुंतवणूक केली, जाल्यार तो फक्त आयटी सेवा दिवपी देश उरनासतना तंत्रज्ञानाचें फुडारपण करपी देश जावंक शकता.
भारताची आयटी मळा वेली वाटचाल ही फक्त अर्थीक उदरगतीची कथा न्हय; ती ज्ञान, कुशळटाय आनी संवसारीक पांवड्यार आपली तांक सिद्ध करपाची काणी आसा. आतां फुडलो टप्पो म्हणल्यार संवसाराचें तंत्रज्ञान वापरचे परस जगा खातीर तंत्रज्ञान निर्माण करप आनी ते दिकेन भारताची पावलां गतीन पडटना दिसून येता, होच संदेश आशांक देसाय हांच्या अमृतमहोत्सवी वाडदीस सुवाळ्यांत वांटेकार जाल्ल्या दिग्गजांनी दिला.

वामन प्रभू
9823196359