भांगरभूंय | प्रतिनिधी
गोंयांतली फाटल्या पांच म्हयन्यांतली आंकडेवारी
पणजीः गोंयचे राष्ट्रीय म्हामार्ग आनी राज्य म्हामार्ग तशेंच मुखेल जिल्हो रस्त्यांचेर एकठांय जाल्लो 159 टनां परस चड कोयर फक्त पांच म्हयन्यांत काडला. सगल्यांत चड 45 टक्के कोयर हो उत्तर गोंयच्या रस्त्या देगे वेल्यान काडला. हो कोयर रस्त्या वेल्यान नेमान एकठांय करून शास्त्रीय पद्दतीन तांचो विलो लायतात, अशी म्हायती गोंय कोयर वेवस्थापन म्हामंडळाच्या अधिकाऱ्यांनी दिली.
गोंय कोंयर वेवस्थापन म्हामंडळाच्या अधिकाऱ्यांनी जाहीर केल्ल्या अधिकृत आंकडेवारी प्रमाण, राज्यांतले खाशेले म्हामार्ग नितळसाण मोहिमे खाला जानेवारी ते मे 2026 ह्या काळांत 159.09 टन कोयर एकठांय केला.
हे आंकडेवारी प्रमाण, उत्तर गोंयांत रस्त्यांचे देगेर सगल्यांत चड कोयर मेळ्ळा, थंय ह्या काळांत 73.03 टन कोयर एकठांय केला. दक्षीण झोनांत 45.85 टन, जाल्यार मध्य झोनांत 40.21 टन कोयराची नोंद जाल्या. ही आंकडेवारी दाखयता की, गोंयांतल्या म्हामार्गांचेर कोयर उडोवप हें एक व्हड पर्यावरणाचें आव्हान उरलां, चड करून ज्या वाठारांनी पर्यटक आनी वाहनांची येरादारी चड आसता थंय ही समस्या चड दिसता, अशें अधिकाऱ्यान सांगलें.
राज्यांतले राष्ट्रीय म्हामार्ग, राज्य म्हामार्ग आनी अधिसुचीत केल्ल्या जिल्हो रस्त्यांचेर पातळिल्लो कोयर पद्दतशीरपणान एकठांय करप, ताचें वर्गीकरण करप आनी शास्त्रीय पद्दतीन ताचो विलो लावप, हाका लागून गोंय कोयर वेवस्थापन म्हामंडळान ही म्हामार्ग नितळसाण मोहीम सुरू केल्या. सध्या ही मोहीम दर दिसा सुमार 419 किलोमिटर रस्त्यांच्या नेटवर्काचेर चालू आसा, जे उत्तर, मध्य आनी दक्षीण गोंय अशा भागांनी वांटप जालां, अशी म्हायती अधिकाऱ्यान दिली.
अधिकाऱ्यान सांगलें की, खाशेले पंगड रस्त्यांचे दोनूय वटेन 10 मिटरा भितरलो कोयर एकठांय करतात, ताचो ओलो आनी सुको कोयर अशें वर्गीकरण करतात आनी तो अधिकृत प्रक्रिया प्रकल्पांनी धाडटात. जबाबदारी आनी पारदर्शकताय वाडोवपा खातीर, ह्या मोहिमेंत वापरतल्या दर एका कोयराच्या पोतयेचेर एक खाशेलो क्युआर कोड आसता, जाका लागून काम करपी पंगड दरेक पोती कोयर भरले उपरांत ती स्कॅन करून डिजिटल नोंद दवरूंक शकतात. कोयर काडचे पयलीं आनी काडले उपरांतचे जिओटॅग केल्ले फोटे काडटात, आनी कोयर व्हरपी सगल्या वाहनांचेर जीपीएस ट्रॅकींग सिस्टम बसयल्या. कामाचेर आशिल्ल्या कामगारांकूय जीपीएस सक्षम वळखपत्रां दिल्यांत, जाका लागून रस्त्यार चलपी कामाचेर रियल टायम देखरेख दवरप शक्य जाता.
ह्या प्रकल्पांत दर 35 किलोमिटरच्या वाठारा खातीर एक वाहन, चार नितळसाण कामगार आनी एक ड्रायव्हर दवरला. सदच्या नितळसाण कामां भायर, म्हयन्यांतल्यान दोन फावटी दर 4 किलोमिटर रस्त्या खातीर एक चड कामगार दवरतात, जो जळामळा पडिल्लो कोयर व्हड कोयराच्यो राशी जावचे पयलींच काडटा.
———–
बॉक्स
एकठांय केल्लो कोयर (जानेवारी- मे 2026)
झोन – एकठांय केल्लो कोयर
उत्तर झोन – 73.03 टन
मध्य झोन – 40.21 टन
दक्षीण झोन – 45.85 टन
वट्ट – 159.09 टन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
