भांगरभूंय | प्रतिनिधी
उजो पालोवपी दळाच्या जवानांची तोखणायेची कामगिरी
म्हापशें, प्रतिनिधीः खोर्ली सीम, म्हापश्यां बांयंत पडिल्ले ६५ वर्सां पिरायेचे एके बायलेक म्हापशें उजो पालोवपी दळाच्या जवानांनी वाटायली. तोल गेल्ल्यान ती बांयंत पडिल्ली.
ही घडणूक बुधवारा दनपरां सुमार १ वरांचेर घडली. बांयंचे कुशीक बशिल्ले हे बायलेचो तोल गेल्ल्यान ती भितर पडली. घरांत ती दिसनाशिल्ल्यान घरच्यांनी घरा भायर तिचो सोद घेतलो. बांयंत पळयलें तेन्ना ती भितर पडिल्ल्याचें कळ्ळें. उपरांत म्हापशें उजो पालोवपी दळाक हे विशींची म्हायती दिली. तांचो पंगड घडणुके सुवातेर येवन तांणी तिका वयर काडली.
हे बांयंत ३० ते ३५ फुटां मेरेन खोल उदक आशिल्लें. पिडेस्त बायल प्रसंग वळखून बांयंत घाल्ल्या वॉटर मोटराच्या पायपाक धरून रावली. ताका लागून ती उदकांत बुडूंक ना. उजो पालोवपी दळाचे अधिकारी अशोक गांवकार हांच्या नेतृत्वा खाला जवान सुरज शेटगांवकार हे निसणीचे मजतीन बांयंत देंवले आनी वांगड्यांचे मजतीन बायलेक भायर काडली. उपरांत तिका दळाचे गाडयेंतल्यान उपचारा खातीर उत्तर गोंय जिल्हो हॉस्पिटलांत दाखल केली. तिची भलायकी बरी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
