भांगरभूंय | प्रतिनिधी
म्हापशें: नवें वर्स येवकर समिती म्हापशें वतीन 9 एप्रील दिसा भौशीक संवसार पडवो म्हापशेंच्या टॅक्सी स्टॅण्डार मनयतले. अंदूंचें हें 21 वें वर्स आसा अशी म्हायती प्रशांत बर्वे हांणी दिली.
काल (बुधवारा) आयोजीत केल्ले पत्रकार परिशदेंत समितीचे अध्यक्ष संजय वालावलकार, अनील सामंत, नारायण शिंदे, अमेय नाटेकार, अंदूंचे उत्सव समितीचे अध्यक्ष महेश कोरगांवकार, सचीव भूषण गावडे, भांडारी रितेश नेवगी, माया शिरोडकार, विजय तिनयकार, सुदांशू साळवी, कौस्तूभ नाटेकार, आदित्य मिशाळ, समीर शिरोडकार, सागर खलप, संदीप आजगांवकार, दर्शन शेट्ये, संतोष गावडे आनी योगेंद्र मांद्रेंकार हे वांगडी हाजीर आशिल्ले.
अध्यक्ष महेश कोरगांवकार हांणी कार्यावळीची म्हायती दितना सांगलें, संवसार पाडव्या निमतान फांतोडेर पांच वरांचेर विवीध प्रभागांतल्या शोभायात्रांक सुरवात जातली. 5.15 वरांचेर श्रीमारुती देवळा कुशीक सगल्यो शोभायात्रा एकठांय येवन भव्य शोभायात्रेक सुरवात जातली आनी शाराक रेवाडो घालून टॅक्सी स्टॅण्डार शोभायात्रेची सांगता जातली.
ह्या वेळार वांटेकार जाल्ले परंपरीक भेसांत, तशेंच हातांत भगवे बावटे घेवन जाल्यार बायलां पंचारती घेवन आसतल्यो. तशेंच यात्रेंत लेझीम पंगड आनी दिंडी पंगडा सयत धोल पंगडाचो आस्पाव आसतलो. ह्या उत्सवांत लोकांनी व्हड संख्येन वांटेकार जावचे अशें आवाहन तांणी केलें.
संजय वालावकार हांणी म्हणलें, टॅक्सी स्टॅण्डार ल्हान भुरग्यांचे वेशभुशेंत सादरीकरण आनी सकाळीं स वरांचेर भौशीक गुढी उबारणी जातली. ह्या वेळार श्रीमारुती स्रोत आनी राम रक्ष पठण जातलें. उपरांत ज्येश्ठ पत्रकार डॉ. उदय निरगुडकर हांचे राम मंदीर ते राष्ट्र मंदीर ह्या विशयाचेर उलोवप जातलें अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
