म्हापश्यां शाळेची मोडतोड, सुमार 5 लाखांचें लुकसाण

भांगरभूंय | प्रतिनिधी

म्हापशें, प्रतिनिधी ः धुळेर – म्हापशेंच्या सेंट अ‍ॅन्थनी शाळेंत अनवळखी मनशान सामान तोडून कागदपत्रांय लासली. तशेंच सीसीटिव्ही डीव्हीआर चोरुन व्हेलो. हो प्रकार रागांतल्यान घडला आसुये असो मुळवो अदमास उक्तायतात. जाल्यार विद्यार्थ्यां कडल्यानूय हें घडला आसूं येता असो दुबाव शाळा वेवस्थापन आनी पुलिसांनी उक्तायला.
ही घडणूक शुक्रारा सकाळीं सुमार 7.20 वरांचेर उजवाडाक आयली. एक कर्मचारी शाळा उगडपाक आयलो तेन्ना ताका शाळेच्या मुखेल गेटीचेर आशिल्लें लॉक तोडिल्लें दिसलें. हो कर्मचारी फुडें गेलो तेन्ना शाळेचें दार उक्तें दिसलें आनी ताचेर आशिल्लेंय लॉक तोडिल्ले. कर्मचाऱ्यान रोखडीच हे घडणुकेची म्हायती शाळेच्या मुख्याध्यापक आनी वेवस्थापनाक दिली. ते उपरांत म्हापाशें पुलिसांक म्हायती दिली.

अनवळखी हल्लेखोरांनी मुख्याध्यापक आनी वेवस्थापकाच्या कुडीचेर आनी कर्मचारी कक्षाचेर लक्ष्य केलें. जनेलां मोडून उडयली. सीसीटीव्हीचो टिव्ही स्क्रीन फोडलो. मुख्याध्यापक आनी वेवस्थापकाच्या कुडींतले लॉकर फोडून भितरले कागदपत्र आनी फायली काडून जळयले. तशेंच कर्मचारी कक्षांतले कागदपत्रां नश्ट केल्यात. तशेंच दुबावितांनी सीसीटीव्ही डीव्हीआर चोरुन व्हेलो.
हे घडणुकेची म्हायती मेळटकच पुलीस निरिक्षक निखिल पालेकार आपल्या वांगड्या सयत घडणुक सुवातेर वचून घडणुकेचो पंचनामो केलो. शाळा वेवस्थापक जॉन मॅन्युएल परेरा हांचे कागाळीचेर आदारून पुलिसांनी भारतीय दंड संहितेच्या कलम 329 (4) आनी 324 (5) खाला अनवळखी व्यक्तीं आड गुन्यांव नोंद केला. पुलिसांनी बोटांचे छाप घेतले आनी श्वान पंगडाचोय वापर केलो.

दुबावितांनी आपल्या वांगडा सीसीटीव्ही डीव्हीआर चोरुन व्हेल्ल्यान तपासात आडमेळीं निर्माण जाल्यात. शाळे भोंवतणच्या आस्थापनांच्या सीसीटीव्हीची खात्री पुलीस पंगड करतात.
शाळेची जनेलां फोडून आनी कागदपत्रां जळोवन अनवळखी मनशान शाळेची तोडफोड केली. सीसीटीव्ही डीव्हीआर सोडल्यार आनीक कसलीच वस्तू चोरूंक ना. पूण ह्या घडणुकीत सुमार 5 लाखांचें लुकसाण जालां अशें सेंट अ‍ॅन्थनी चेअरमन ब्र. एडमुंड लेमॉस हांणी सांगलें.