भांगरभूंय | प्रतिनिधी
म्हापशें, प्रतिनिधी: म्हापशेंच्या आदल्या आझिलो हॉस्पिटला लागसार इमारतींतल्या आरके लॉ फर्म ह्या ऍड. एन. नोरोन्हा हांच्या कार्यालयाक उजो लागलो. हातूंत सुमार २ लाखांचें लुकसाण जालें.
ही घडणूक सोमारा सुमार १२.३० वरांचेर शॉर्ट सर्कीटाक लागून घडली. ह्या वेळार हे इमारतीचे पयले माळयेवेल्या कार्यालयांत विराज नांवाचो कामगार आशिल्लो. अचकीत कार्यालयांतल्या एसींत शॉर्टसर्कीट जाली आनी रोखडोच ताका उजो लागलो.
कार्यालयांत उजो लागताच विराज हो कार्यालयांतल्यान भायर धांवलो आनी तांणी उजो पालोवपी दळाक फोन केलो. म्हापशें उजो पालोवपी दळाचे जवान थंय पावता म्हणसर पुराय कार्यालयांतल्यान धुंवर भायर सरतालो. जवानांनी येवन उदकाचो फवारो मारून उजो नियंत्रणांत हाडलो.
इपरांत दळाचे उपअधिकारी प्रकाश कान्नायक हांणी ऑक्सीजन सिलींडर घालून घडणुके सुवातेर भितर प्रवेश केलो आनी उजो पालयलो. हे घडणुकेंत कार्यालयांतलें फर्नाचर, कागदपत्रां आनी हेर सामानाचो गोबोर जालो. सुमार २ लाख रूपयांचें लुकसाण जालें.
उजो पालोवपी दळाचे अधिकारी गणेश गोवेकार, उपअधिकारी ज्ञानेश्वर सावंत, उपअधिकारी प्रकाश कान्नायक हांच्या नेतृत्वाखाला योगेश आमोणकार, प्रविण गोवेकार, देवेंद्र नायक, संजू कोरगांवकार, दिलीप सावंत, जितेंद्र नायक आनी भिकाजी काळोजी हांणी उजो नियंत्रणांत हाडलो. घटनेची म्हायती थळावे नगरसेवक प्रकाश भिवशेट हांनी भेट दिवन पळोवणी केली. म्हापशें पुलीस उपनिरीक्षक दत्तप्रसाद पंडित हांणी सहकार्यां सयत घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
