म्हापश्यां लासलो मंत्री ढवळीकाराचो बावलो

भांगरभूंय | प्रतिनिधी

स्वताचे हिकमतीचेर वेंचून येवन दाखोवपाचें नामकरण समितीचें सुदिन ढवळीकाराक आव्हान

भांगरभूंय । प्रतिनिधी

म्हापशें: मोपा विमानतळाक गोंयचे भाग्यविधाते भाऊसायब बांदोडकार हांचेंच नांव दिवचें, अशी मागणी करून मोपा विमानतळ नामकरण समिती वतीन म्हापश्यां मंत्री सुदिन ढवळीकार हांच्या विधानाचो निशेध केलो आनी तांचो बावलो लासलो. मंत्री ढवळीकार हांणी मगो पक्ष सोडून स्वताचे हिकमतीचेर मडकय मतदारसंघांत वेंचून येवन दाखोवचें, अशें समितीन तांकां आव्हान दिलें.

बुधवारा सांजे वेळार म्हापशेंच्या भाऊसायब बांदोडकार हांच्या पुतळ्या मुखार भाऊसायब बांदोडकार मोपा विमानतळ नामकरण समितीन आयोजीत केल्ले पत्रकार परिशदेंत मंत्री ढवळीकार हांच्या विधानाचो खर उतरांनी निशेध केलो.

ह्या वेळार समितीचे निमंत्रक सुभाष केरकार, दीपेश नायक, जितेश कामत, नारायण गडेकार, सितेश मोरे आनी हेर मानेस्त हाजीर आशिल्ले.

सरकारान जनभावनेचो आदार करून मोपा विमानतळाक भाऊसायबाचेंच नांव दिवचें. सरकार त्या विमानतळाक भाऊसायबाचेंच नांव दितले, अशी आमकां आस्त आसा. जर तशें जालें नाजाल्यार सगळे भाऊ मोगी उपरांत आपली खर भुमिका स्पश्ट करतले, अशें हे नामकरण समितीन ह्या वेळार स्पश्ट केलें. मगोपचे केंद्रीय समितीन हालींच भाऊसायबाचें नांव मोपा विमानतळाक दिवचें, असो थाराव घेतला. पूण आतां आपली भुमिका बदलून भाजपाचें केंद्र सरकार जो निर्णय घेतलें, तो मगोक मान्य आसतलो, अशी भुमिका ह्या पक्षान घेतली आनी आतां मंत्री ढवळीकार लेगीत तेंच उलयता. ढवळीकार हांणी आपली दुटप्पी भुमिका स्पश्ट करची. तांचो खरो मोग मगोचेर आसा काय भाजपाचे सत्तेचेर, तें तांणी स्पश्ट करचें. मोपा विमानतळाक भाऊसायबाचेंच नांव दिवचें, अशी शिफारस राज्य सरकारान केल्ली, पूण भाजपान हें नांव आतां कुशीक काडलां. भोवजन समाजा वांगडा भाऊसायबांचो हो व्हड अपमान, अशी टिका संजय बर्डे आनी जितेश कामत हांणी केली.

मगोक बांदला भाजपाचे दावणेकः केरकार

मगो आनी भाऊसायबांच्या नांवाचेर सुदिन ढवळीकार सत्ता उपभोगता. पूण मंत्री ढवळीकार हांणी आयज मगो पक्ष भाजपाच दावणेक बांदून तांचें व्हडपण गायता. ढवळीकार हांणी मगोपच्या जिवाचेर स्वताचें राजकी साम्राज्य उबारलां, अशें सुभाष केरकार हांणी सांगलें.