भांगरभूंय | प्रतिनिधी
म्हापशें: पालिकेन शारांतलीं मॉन्सनपूर्व नितळसाणीचीं कामां हातांत घेतल्यांत. पालिका वाठारांतल्या 20सूय प्रभागांतलीं गटारां आनी व्हाळ उस्पुपाचें पयल्या टप्प्यांतलें काम एप्रीलच्या मध्या मेरेन पुराय जावप अपेक्षीत आसा.
अंदूं म्हापशें पालिकेन सगल्या 20सूय प्रभागांतलीं मॉन्सूनपूर्व कामां सुरळीत जावचीं हे खातीर नितळसाणीच्या कामांक आतां सावनूच गती दिल्या. हे खातीर पालिकेन वेळापत्रक तयार केलां आनी सगल्या प्रभागांची दोन गटांत विभागणी केल्या. दरेक गटांत 10 प्रभागांचो आस्पाव आसा. हातूंतल्या गटारांची नितळसाण करपा खातीर दरेकी 10 कामगार आनी एक कोयर व्हरपी वाहनाची नेमणूक केल्या.
नगराध्यक्षा प्रिया मिशाळ हांणी म्हायती दितना सांगलें, मॉन्सूनपूर्व कामाचो भाग म्हूण प्रभागांतल्या गटारांतलो गाळ उस्पुपाचें काम पालिकेन सुरू केलां. प्रभाग 1 ते 10 आनी प्रभाग 11 ते 20 अशा दोन गटाच्या माध्यमांतल्यान हीं कामां करतले. ते खातीर गरजेचे कामगार आनी वाहनांची वेवस्था केल्या. गटार उस्पुपाचो पयलो टप्पो एप्रीलाच्या मध्या मेरेन पुराय करपाचें उद्दिश्ट आसून उपरांत दुसऱ्या टप्प्याचें काम सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
