भांगरभूंय | प्रतिनिधी
म्हापशें: हावसींग बोर्ड म्हापश्यां एका घरांत घुसून बायलेक लुबाडपाचो यत्न करीत तीन बनावट तृतीय पंथियांक लोकांनी धरून येथिश्ट बडयले. ह्या तिगांय दुबावितांक म्हापशेंच्या पुलिसांनी प्रतिबंधक कारवाये खाला अटक केल्या.
अटक केल्ल्या ह्या तृतीय पंथियां मदीं दुबावीत भानुदास सावंत, रंजू सोळंकी आनी महेंद्र नागनाथ हांचो आस्पाव आसा. दुबावीत आरोपी मूळ महाराष्ट्रांतले आसून थिये राबित्याक आसात.
ही घडणूक बुधवारा 13 वेर दनपारां एक वरांच्या सुमाराक हावसींग बोर्ड म्हापश्यां घडली. ह्या हावसींग बोर्ड कॉलनींत तृतीय पंथियांचो 9 जाणांचो गट घराघरांनी आनी आस्थापनांनी भोंवून पयशे मागता. ह्या वेळार दुबावीत आरोपी एके इमारतींत गेले. थंयच्या एका फ्लॅटांत बायले कडेन तांणी पयशे मागले. तिणें 50 रुपया काडून दिले. पूण इतली उणी रक्कम नाका अशें म्हणून तिका धुकलून घरांत घुसले. तेच बरोबर तिणें बोवाळ घालो. तेन्ना दुबावितांनी घडणूक थळा वेल्यान पळ काडलो.
ते बायलेन आपल्या घोवाक घडणुकेची म्हायती दितकच तांणी घडणूक थळार धांव घेतली आनी शेजाऱ्यांच्या आदारान दुबावितांचो सोद घेतलो. तेन्ना इमारतीचे दुसरे वटेन वयले तिगूय जाण बशिल्ले सांपडले. तांकां ह्या जमावान येथिश्ट बडयलो. चवकशे वेळार दुबावितांनी ह्या वाठारांत णव जाणांचो गट भोंवत आशिल्ल्याचें तांणी सांगलें.
दुबावीत तृतीय पंथी नाशिल्ल्याचो लोकांक दुबाव आयलो. जमावान तांची झडटी घेतली तेन्ना दुबावीत हे बनावट आशिल्ल्याचें दिसून आयलें. उपरांत म्हापशें पुलिसांक आपोवन दुबावितांक पुलिसांचे सुवादीन केले. पुलिसांनी ह्या तिनूय दुबावितांक भादंसंच्या 41 कलमा खाला प्रतिबंधक कारवाये खाला अटक केली. फुडलो तपास पुलीस करतात.
म्हापश्यां तशेंच बार्देस म्हालांत बोगस तृतीय पंथियांचो वावर व्हड प्रमाणांत सुरू आसा. लोकां कडेन हे बनावट लोक शंबर ते पांच हजार रुपयांची मागणी करतात. नाजाल्यार शाप दिवपाची धमकी दितात. हे बोगस लोक तृतीय पंथीय जमातीची बदनामी करीत आसून सरकारान ह्या पंगडाचेर खर कारवाय करची अशी मागणी रहिवासी डॉ. पृथ्वी आमोणकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
