भांगरभूंय | प्रतिनिधी
उपसभापतीः 30 कोटींच्या उदरगतीच्या कामांक सुरवात
भांगरभूंय । प्रतिनिधी
म्हापशें: अमृत येवजणे वरवीं म्हापशें शारांत तीन ओव्हरहेड उदकाच्यो टांकयो आनी एक जमनीचेर टांकी अश्या चार टांकयां सयत उदकाची पायपलायन घालपाचें काम हातांत घेतलां. गणेशपुरी, फेअरा आल्त आनी करासवाडो ह्या वाठारांतनी ओव्हरहेड उदकाच्यो टांकयो बांदतले. ह्या कामाचेर सुमार 13 कोटी रुपया खर्च जातलो, अशें उपसभापती ज्योशुआ डिसोझा हांणी सांगलें.
अमृत येवजणे खाला म्हापशें शारांत चार उदकाच्यो टांकयो बांदपा सयत नवी उदकाची पायपलायन घालपाच्या कामांक उपसभापती ज्योशुआ डिसोझा हांचे हस्तुकीं सुरवात जाली. ह्या वेळार ते उलयताले.
तांचे वांगडा नगराध्यक्ष डॉ. नुतन बिचोलकार, उपनगराध्यक्ष सुशांत हरमलकार, नगरसेवक आशिर्वाद खोर्जुवेंकार, शुभांगी वायंगणकार, प्रिया मिशाळ, बार्बरा कारास्को, चंद्रशेखर बेनकार, विराज फडके, साईनाथ राऊळ आनी थळावे लोक हाजीर आशिल्ले. दरेके टांकयेची तांक 650 घनमिटर आसतली. जाल्यार 2 हजार घनमिटर तांकीची टांकी जमनीर दत्तावाडी वाठारांत बांदतले. हाचेर 10 कोटी रुपया खर्च करतले. तशेंच प्रभाग 6, 9 आनी 12 त नवी उदकाची पायपलायन घालतले. ह्या टांकयांक लागून फुडारांत शारांतलो पियेवपाच्या उदकाचो प्रस्न सासणाचो सुटावो जातलो. शाराचो विस्तार पळोवन म्हत्वाकांक्षी अमृत येवजणेंतल्लयान ह्यो टांकयो बांदतात तशेंच उदकाची पायपलायन घालतात. फुडारांत उदक प्रकल्पाचे सुवातेर कांय समस्या वा उदकाची पायपलायन नादुरुस्त जाली जाल्यार वा हेर प्रस्न उप्रासले जाल्यार उण्यांत उणे तीन ते चार दीस शाराक ह्या टांकयांच्या माध्यमांतल्यान उदका पुरवण जातली, अशें डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
