भांगरभूंय | प्रतिनिधी
पर्यटक प्रवाशांची गैरसोय
म्हापशें: नव्या आंतरराज्य कदंब बस स्टॅण्डा वेलो पे टॉयलेट बंद आशिल्ल्यान प्रवाशांची गैरसोय जायत आसा.
सोमारा 20 वेर दनपारा अचकीत ह्या पे टॉयलेटाक कंत्राटदारान कुलप लायलें. शौचालय बंद आशिल्ल्याची म्हायती दिवपी कसलीच भौशीक सुचोवणी थंय लावंक नाशिल्ली.
ह्या बस स्टॅण्डार शेंकड्यांनी भायल्या राज्यांतल्यान प्रवासी येतात. हे प्रवासी चड करून पर्यटक आसतात. संवसारीक पर्यटन क्षेत्र आशिल्ल्या गोंयाक पर्यटकांची गैरसोय ती लेगीत सरकारी बस स्टॅण्डार जायत आशिल्ले खातीर प्रवाशांनी निरशेणी उक्तायली.
महाराष्ट्रांतल्या बायला प्रवाशांनी म्हणलें, महाराष्ट्रांत आमकां असो अणभव केन्नाच आयलो ना. पूण पर्यटन थळ आशिल्ल्या गोंयांत आयलो. टॉयलेट सुविधा नाशिल्ल्यान दादल्यां परस बायलांक चड त्रास जाता. दादले खंयूय वचूंक शकतात. तांकां अडचण येना. पूण बायलांचे तशें आसना. ह्या बस स्टॅण्डार एक शौचालय फावो अशें ना. प्रवाशांची अशी गैरसोय जावची ना हाची सरकारान काळजी घेवंक जाय.
दुसरे एके औरंगाबादचे प्रवासी बायल पर्यटकान म्हणलें, शौचालय बंद आशिल्ल्यान समस्यांक सामकार वच्चें पडटा. प्रवाशांची अशी गैरसोय जावची न्हय. ते खातीर पे टॉयलेट कंत्राटदारा सयत बस स्टॅण्डाच्या वेवस्थापकांनी इमानदारीन काम करूंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
