भांगरभूंय | प्रतिनिधी
अन्न आनी वखदां प्रशासनाची आंतरराज्य बस स्टॅण्डार कारवाय
म्हापशें: आंतरराज्य प्रवासी बशींतल्यान जावपी खाद्यपदार्थांची येरादारी आडावपाचे मोहिमे खाला अन्न आनी वखदां प्रशासनान म्हापशेंच्या आंतरराज्य बस स्टॅण्डार परतून धाड घाली. महाराष्ट्रांतल्यान बस येरादारी मार्गान हाडटना योग्य जतनाय तशेंच लेबल नाशिल्लें 150 कील पनीर आनी धंया सयत 50 कील तळिल्लो कांदो (फ्रायड ओनियन) असो देड लाखांचो म्हाल जप्त केलो.
मंगळारा सकाळीं 7 वरांच्या सुमाराक अन्न आनी वखदां प्रशासनाच्या अधिकाऱ्यांनी ही धाड घाली. ठाणे मुंबय सावन गोंयांत पनीराची येरादारी जावपाची आसा अशी खात्री दिवपी म्हायती गोपां कडल्यान प्रशासनाक मेळिल्ली.
तशेंच कांय राज्यांनी उत्पादक दुदाच्या फॅटाक पर्याय म्हूण खावपाचें तेल घालून ताचे पसून पनीर तयार करतात आनी उपरांत ते दुसऱ्या राज्यांनी धाडटात. हें पनीर दर्ज्यात्मक नासता असो अहवाल राष्ट्रीय पांवड्यार प्राप्त जाल्लो.
ते प्रमाण आंतरराज्य बस स्टॅण्डार गोंया भायल्या राज्यांतल्यान आयिल्ल्या सगल्या अन्न पदार्थाच्या पार्सलाची गुणवत्ता अधिकाऱ्यांनी तपासली. हातूंत 500 कील पनीर आनी 150 कील धंय सांपडलें. जें योग्य कोल्ड चेन आनी लेबलाची सविस्तर म्हायती नाशिल्ली. तशेंच 50 कील तळिल्लो कांदो सांपडलो. हो कांदो मुंबय सावन हाडिल्लो.
पनीर म्हापश्यां जाल्यार कांदो कळंगूटेच्या वेपाऱ्याक धाडून दिल्लो. अन्न सुरक्षा आनी पॅकेजींग निकशां प्रमाण हे पदार्थ योग्य प्रकारान हाडूंक नाशिल्ल्याचें पळोवणेंत दिसून आयलें.
पडटाळणे उपरांत नमुने घेवन हे पदार्थ जप्त केले आनी उपरांत म्हापशें पालिकेच्या आदारान ह्या सगल्या पदार्थाचो विलो लायलो.
मजगतीं, ह्या पंगडान म्हापशें शारांत वस्तू विकपी विक्रेत्यां कडल्यान रंगीत कापूस कॅण्डी जप्त केली आनी ताचे नमुने घेतले.
प्रशासनाच्यो संचालक ज्योती सरदेसाय हांच्या मार्गदर्शना खाला अधिकारी रिचर्ड नोरोन्हा, वरिश्ठ अन्न सुरक्षा अधिकारी राजाराम पाटील आनी शैलेश शेणवी, अन्न सुरक्षा अधिकारी प्रितम परब, माधव कवळेंकार, सोनल गोवेकार आनी प्रदीप पार्सेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
