भांगरभूंय | प्रतिनिधी
म्हापशें: ग्रॅण्ड पेडें म्हापश्यां मिया खतीब हाच्या घराक उजो लागून रोख रकमे सयत सुमार 5 ते 6 लाखांचो मुद्देमाल लासून गोबर जालो. हे दुर्घटणे फाटल्यान घातपात आसपाचो दुबाव घरधनयान उक्तायला.
ही दुर्घटणा शुक्रारा दनपारां 12.52 वरांचेर घडली. घडणुकेची म्हायती मेळटाच म्हापशें उजो पालोवपी दळ तशेंच पुलिसांनी घडणुकेचे सुवातेर धांव घेतली. दुर्घटणा जाल्लें घर बंद आसिल्लें. ताका लागून दळाच्या जवानांनी घराचें दार फोडून उदकाचो फवारो मारून उजो नियंत्रणांत हाडलो.
घडणुकेची म्हायती मेळटाच खतीब कुटुंब घरा आयले. हे दुर्घटणेंत घरांतल्यो दोन कुडी पुराय मुद्देमाला सयत लासल्यो जाल्यार चडशें घर उज्या पासून जवानांनी वाटायलें.
उजो लागिल्ले कुडींतले आलमारींत आशिल्ले 25 हजार रुपया रोख तशेंच हेर वस्तूंचो लासून गोबर जालो. भांगराच्यो वस्ती जवानांनी वाटायल्यो. उज्यात घरांतलें फर्निचर, कपडे, घराचे वाशे आनी हेर साहित्य मेळून सुमार 5 ते 6 लाख रुपयांचें लुकसाण जालें.
मजगतीं, हे दुर्घटणे फाटल्यान घातपात आसा. घराचेर चडून कोणे तरी उजो लायिल्ल्याचो दुबाव खतीब कुटुंबान उक्तायला. ह्या प्रकरणांत फुडलो तपास म्हापशें पुलीस करतात. म्हापशें उजो पालोवपी दळाचे उपअधिकारी प्रकाश कान्नायक हांच्या फुडारपणा खाला साहील गांवस, नितीन चोडणकार, प्रवीण नायक गांवकार, जयेश कानोळकार आनी प्रवीण पिसुर्लेंकार ह्या जवानांनी उजो नियंत्रणांत हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
