भांगरभूंय | प्रतिनिधी
म्हापशें, प्रतिनिधी ः म्हापशेंच्या ग्रॅण्ड पेडे हांगा मिया खतीब हांच्या घरांक उजो लागलो. ह्या उज्यांत रोख रक्कमे सयत सुमार 5 ते 6 लाखांची मालमत्ता जळ्ळी. हे घडणुकी फाटल्यान घातपात आशिल्ल्याचो दुबाव घराच्या धनयान उक्तायला.
ही घडणूक शुक्रारा सुमार 12.52 वरांचेर घडली. म्हायती मेळटाच म्हापशें उजो पालोवपी दळ आनी पुलीस सुवातेर पावलें. घडणुकी वेळार घर बंद आशिल्लें. देखून जवानांनी घराचें दार फोडून उदकाचो फवारो मारुन उजो नियंत्रणात हाडलो.
घडणुकेची खबर मेळ्ळ्या उपरांत खतीब कुटुंब घरां पावलें. ह्या उज्यांत घरांतलीं दोन कुडीं आनी कुडींतले पुराय सामान उज्यांत लासले जाल्यार हेर घरांचो भाग दळाच्या जवानांनी उज्या पसून वाटायलो. जळिल्ले आलमारींत 25 हजार रुपया आनी हेर वस्तू आशिल्ल्यो. पूण भांगर उजो पालोवपी दळान वाचयले. घरांतलें फर्निचर, कपडे आनी हेर सामान मेळून सुमार 5 ते 6 लाख रुपयांचें लुकसाण जालां.
मजगतीं, ह्या अपघाता फाटल्यान घातपात जाला आनी कोणे तरी घराचेर चडून उजो लायलो असो दुबाव खतीब कुटुंबान उक्तायला. ह्या प्रकरणांत म्हापशें पुलीस फुडली चवकशी करतात. म्हापशें उजो पालोवपी दळाचे उप अधिकारी प्रकाश कान्नायक हांच्या फुडारपणा खाला साहिल गावस, नितीन चोडणकार, प्रवीण नायक गांवकार, जयेश कानोळकार आनी प्रवीण पिसुर्लेकार हांणी हो उजो नियंत्रणात हाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
