भांगरभूंय | प्रतिनिधी
भांगरभूंय । प्रतिनिधी
म्हापशेंः सरकारान म्हापशें हांगा सध्या आशिल्ले अबकारी कार्यालय पर्वरी हाडपाच्यो हालचाली सुरू केल्ल्यान संबंदीत लोकां मदीं हुस्को पातळ्ळा. म्हापशें ज्या इमारतींत हें ऑफीस आसा थंयचें लिफ्ट फाटल्या कांय म्हयन्यां सावन चलना देखून तें पर्वरी हाडपाचें सरकारान थारायलां अशी म्हायती मेळ्ळ्या. लोकांनी मात हाका विरोध केला.
अबकारी कार्यालय पर्वरी हांगा हाडपा खातीर सुवात सोदपाक अबकारी अधिकाऱ्यांक सांगल्लें. मार्च म्हयन्यांत तें पर्वरी हाडपाचे आशिल्लें मात लोकसभा वेंचणुकेची आचार संहिता लागू जाल्ल्यान आता हें स्थलांतरण मे म्हयन्यात जातलें अशी म्हायती एका जेश्ठ अबकारी अधिकाऱ्यान दिली. चड करून हें ऑफीस पर्वरी हावसिंग बोर्ड संकुलांत सुरू करतले.
म्हापशें हें बार्देश तालुक्याचें मुखेल शार आशिल्ल्यान थंयच्यान अबकारी कार्यालय पर्वरी हाडप सारकें न्हय अशें कांय लोकांनी सांगलें. दरेका कामा खातीर पर्वरी वच्चें पडटलें म्हणून अखील गोंय बार आनी रेस्टॉरंन्ट धनी असोसिएशनाचो अध्यक्ष मायकल कारास्कोन अबकारी कार्यालय पर्वरी व्हरपाच्या सरकारी येवजणे विशीं हुस्को उक्तायला. म्हापशें हें म्हत्वाचें वेपारी आनी सरकारी कार्यालयाचें मुखेल केंद्र आसा. अबकारी खात्यांतल्या कामा खातीर बार्देशच्या लोकांक पर्वरी वचपाक लावप समा न्हय अशें ताणे सांगलें.
म्हापशें वेपारी संघटनेचो आदलो अध्यक्ष आशिष शिरोडकार हाणे लेगीत अबकारी कार्यालय पर्वरी व्हरपाक विरोध केला. हे कार्यालय पर्वरी व्हेल्यार लोकांक त्रास जातले अशें शॅक धनी वेलफॅर सोसायटीचो सचीव जॉन लोबोन सांगलें. पर्वरी सध्या नव्या कॅरिडोराचें काम चल्लां. ताका लागून लोकांची दोन तीन वर्सां तरी सामकी गैरसोय जातली अशें ताणे सांगलें. पर्वरी हांगा बऱ्यो सुविधा उलबद्ध करून दिल्यार थंय अबकारी कार्यालय हाडल्यार साबार लोकांक बरें पडटलें अशें अखील गोंय लिकर वेपारी असोसिएशनाच्या दत्तप्रसाद नायकान सांगलें. म्हापशें आनी पर्वरी मजगतीं फकत पांच किलोमीटरांचें अंतर आशिल्ल्यान तें चड अशें न्हय. म्हापश्या पार्किंगाची सारकी वेवस्था ना हे गजाली कडेन ताणें लक्ष ओडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
