भांगरभूंय | प्रतिनिधी
म्हापशें: म्हापशें शारांत रस्त्यांचेर तशेंच रस्त्याचे कुशीक शेंकड्यांनी गाडयो बेवारस स्थितींत पार्क करून दवरल्यात. वर्सांन वर्स एकेच सुवातेर दवरिल्ल्या ह्या गाडयांक लागून येरादारीक आडखळ निर्माण जाता. तेचवरी पार्किंगचो लेगीत प्रस्न निर्माण जाला.
म्हापशें पालिका वाठारांत, चड करून शार वाठारांत रस्त्याचे कुशीक वा फुटपाथांचेर तशेंच गाडयांचे गॅरेजी मुखार दुचाकी आनी चारचाकी गाडयो पार्क करून दवरल्यात. ह्यो चडश्यो गाडयो बंद स्थितींतल्यो आसा. ती कितल्याशाच वर्सां सावन त्यो थंयच्यो काडूंक नात. ताका लागून ह्या गाडयांची येरादारीक आडखळ जाता. तशेंच गाडयो पार्किंगाचीय समस्या उप्रासता. तेच वरी पावसाळ्यांत ह्यो गाडयो जळारांची पैदास करपी केंद्रां थारतात.
ह्यो गाडयो काडपा संबंदांत पालिकेन म्हापशें पुलीस आनी येरादारी पुलिसांक पत्र धाडिल्लें. बेवारस तरेन रस्त्याचे कुशीक पार्क केल्ल्या गाडयांचेर कारवाय करपाची विनवणी केल्ली. पूण त्यो गाडयो उखलून व्हरून दवरचे खातीर योग्य सुवात नाशिल्ल्याचे पुलिसांनी पालिकेक कळयल्लें आनी सुवात उपलब्ध करून दिवपाची मागणी केल्ली.
शारांतले रस्ते आनी पार्कींग सुवातो खूबश्या बेवारस गाडयांनी आडायल्या. पुलिसांक एक फावोशी सुवात दिवन त्यो गाडयो थंय दवरपाचो निर्णय फेब्रुवारी 2023 त जाल्ले पालिका मंडळाचे बसकेंत घेतिल्लो. तशेंच एप्रील 2023 चे मान्सूपूर्व बसकेंत 15 दिसांनी त्यो गाडयो काडटले, अशें आस्वासन पालिके वतीन दिल्लें. पूण ते उपरांत वयलो निर्णय आनी आस्वासनां पालिकेन पुराय करूंक ना. ताका लागून शारांतल्या चडश्या रस्त्यांचेर बेवारस गाडयांचे संख्येन वाड जाल्या. तातूंतल्यो चडश्यो गाडयो चोरयेच्यो आसुये, असो दुबाव लोकांनी उक्तायला.
मजगतीं, नगराध्यक्ष डॉ. नूतन बिचोलकार हांणी सांगलें, दरेकल्यान आपली जापसालदारकी म्हूण येरादारीक कसलीच आडखळ जावची ना, हे खातीर लोकांनी गाडयो पार्कींग करतना जतनाय घेवची. तशेंच आपल्यो गाडयो रस्त्या वयल्यो काडच्यो, अशीय तांणी विनवणी केली.
शारांतले येरादारीक आडखळ थारपी गाडयांची नोंद घेवन त्या गाडयांच्या धनयांक पालिके वतीन नोटीस धाडटले. तशेंच पुलिशे वतीन ह्या गाडयांचेर कारवाय करपाचेर विचार चल्ला. बेगिनूच हाचेर उपाय काडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
