भांगरभूंय | प्रतिनिधी
म्हापशें : म्हापशें शारांत वट्ट ४९ इमारती धोक्याचे स्थितींत आशिल्ल्याचें दिसलां. ह्या असुरक्षीत इमारतींत ४२ खाजगी जाल्यार ७ शासकीय इमारतींचो आसपाव आसा. पावसाचे फाटभूंयेर बार्देसच्यो उपजिल्लोधिकारी वर्षा परब हांच्या नेतृत्वा खाला म्हापशें शारांतल्यो असुरक्षीत आनी धोको निर्माण करपी इमारतींची परत तपासणी करपाची जोड मोहीम राबयली.
बिरेस्तारा २१ तारखेर राबयिल्ले हे मोहिमे वेळार म्हापश्यां नगरपालिका आनी भौशीक बांदकाम खात्याच्या इमारत विभागाचे अधिकारी हाजीर आशिल्ले. उत्तर गोंयच्या जिल्लोधिकार्यांनी दिल्ल्या आदेशा प्रमाण ही मोहीम हातांत घेतली. पावसाचे पुर्व तयारेचो एक भाग म्हणून संरचनात्मक नदरेन दुबळे आशिल्ले इमारतीक लागून कसलीच वायट घडणूक घडची न्हय, हे खातीर ही विशेश सुचवणी जिल्लोधिकार्यांनी केल्ली.
ह्या वेळार ह्या पंगडान असुरक्षित आनी धोक्याच्यो म्हणून घोशीत केल्ल्यो शासकीय तशेंच खासगी इमारतींक प्रत्यक्ष भेट दिली आनी तांचे सध्याचे स्थितीचो तशेंच संरचनात्मक स्थिरतेचो आढावो घेतलो.
धोक्याच्या इमारतींच्या धनयांक नोटीसो
म्हापशें पालिकेन शारांत सुमार ४२ खासगी धोकादायक आनी मोडपाक पाविल्ल्या इमारतींची वळख पटल्या. सध्या वापरांत वा लोक रावपी धोक्याच्या इमारतींच्या धनयांक जागो रिकामो करपाची परत नोटीस धाडपाची प्रक्रिया सुरू आसा. हेर इमारतींच्या धनयांक गरजेच्यो सुरक्षा उपाय येवजण्यो करपाचे निर्देश दिल्यात. भौशीक बांदकाम खात्याच्या इमारत विभागान ७ धोक्याच्यो इमारती सोदल्यात. हातूंत पोरण्या निवासी क्वाटर्सचो आसपाव आसा.
परत तपासणी मोहीम राबयल्या: उपजिल्लोधिकारी
म्हापशेंच्या असुरक्षीत म्हणून चिन्नांकीत केल्ल्या इमारतींच्या संरचनात्मक स्थिरतेची तपासणी आनी संभाव्य घडणूक टाळपा खातीर गरजेचे उपाय आनी कारवायेच्या हेतान आमी परत तपासणी मोहीम राबयल्या. म्हापशें नगरपालिकेन निश्चीत केल्ल्या खाजगी इमारतींचो तशेंच साबांखाची इमारत विभागान चिन्हांकीत केल्ल्या शासकीय इमारतींचो हे तपासणेंत आसपाव आशिल्ल्याची म्हायती बार्देसच्या उपजिल्लोधिकारी वर्षा परब हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
